Presidente di Camara di Comercio (KvK), Kawish Misier a indica cu gobierno ta biniendo cu algun adaptacion riba e sugar tax. Pero e proceso di adaptacion of cambio a tuma luga durante e 6 luna entre e cambio di fasenan di e reforma fiscal y no tabatin niun comunicacion den forma di reunion cu KvK durante e periodo aki.
Segun Misier, KvK a manda carta sin contesta y net dos siman pasa nan a reuni cu minister y KvK a compronde cu nan kier bin cu un sugar tax nobo den e fase 3. Pero e gremio comercial no sa cuanto e ta, y tampoco nan no sa cual productonan ta cay den tax nobo aki. “Nos ta sinti cu e no ta un tax husto pasobra hopi producto cu ta contene sucu no lo haya e sugar tax…,” el a bisa.
KvK ta compronde cu gobierno kier bin cu e tax aki pa atende cu e salud di hende, pero nan ta haya cu esaki no ta e manera. Pasobra nos turista por ehempel no ta bin vakantie pa haci saludabel, sino pa bebe. Cu e introduccion di e ultimo tax e consumo di alcohol a bira mas caro y awor cu e sugar tax e ta bira mas caro. Esaki tin su impacto ya cu e bebidanan ta birando cada bes mas impagabel. Nos tin cu tene cuenta pa no daña e producto turistico di Aruba.
