Presidente di Camara di Comercio di Aruba (KvK), Ernst  Mohamed a bisa cu nan ta tendiendo cuenta cu tur e observacion, critica constructivo y remarca cu a wordo formula den diferente media relaciona cu e prome debate politico cu nan a organisa.

Intencion di KvK ta di evalua sin nan lo bin cu cambio pa e di dos y ultimo debate cu nan lo organisa dia 17 di augustus casi na porta di eleccion general di dia 22 di september awor.

E ta haya cu e debate tabata ‘bon ricibi den pueblo’; y nan a haya hopi reaccion positivo y hopi critica constructivo tambe cu nan ta  evaluando tur cos awor. E comision cu a traha den e debate aki ta sigui reuni pa wak con nan ta bay restructura nan proximo evento cu nan ta premira cu lo bira mas grandi ainda.

Encuanto e echo cu hopi hende a sinti cu no tabatin un debate berdaderamente sino cu e lidernan politico cu a participa gewoon a trece nan opinion, sr. Mohamed a laga sa cu nan a  dicidi cu e prome debate por a bira algo informativo y no un debate riba su mes. E ta haya cu asina e comunidad por sa ‘ken tin kico’; y asina crea un plataforma unda pueblo por a haya e miho bista di cada lidernan di partido cu a participa den dje.

Den e di dos debate nan lo mira cual partido a keda registra den conseho electoral pa asina acerca nan pa invita nan lidernan di  partido den e debate aki. Pero prome e comision encarga cu e debate mester dicidi con nan lo organisa nan y cual criterio nan lo uza den e di dos debate. Presidente di KvK ta premira cu e debate lo haya basta atencion ya cu e ta un par di siman prome cu eleccion; y asina e pueblo votado por tin un bista mas amplio pa tuma nan decision mas consciente.

Otro debate
KvK ta aplaudi y sostene e iniciativa di e Millenium Group cu lo organisa un debate pa un segmento specifico di nos poblacion. E ta haya esaki relevante y di aplaudi; ya cu e hobennan ta consisti di un parti grandi di e votadonan.  El a remarca cu e debate organisa pa Millenium Group ta diferente na esun organisa pa KvK; ya cada un di nan tin nan rason y nan metanan.  KvK ta bay evalua con e debate di Millenium Group  lo bay tambe. E debate di Millenium lo tin participacion di mas partido pasobra segun sr. Mohamed tabatin partido cu a registra laat, despues cu KvK a bin cu e fecha limite pa registra cerca nan den pa e prome debate.

Encuanto e criticanan cu KvK su prijs pa ticket pa wak e debate ta mucho halto, sr. Mohamed a reacciona bisando cu e topico aki tabata uno hopi discuti entre nan mes y nan a bin cu algun adaptacion. “Pero despues di e debate nos no a tende nada mas di e prijs. Kiermen of e prijs tabata bon pa locual ta e calidad of ningun hende no a worry cu prijs; nan a worry cu e calidad.” Sinembargo nan lo evalua e prijs; pero el a indica cu e evento aki cu KvK ta organisa no ta uno barata; y tin gastonan cu nan mester cubri nan.