Na final di e anochi pa locual tabata e segundo debate electoral ayera organisa door di Camara di Comercio (KvK), por a tuma nota cu presidente Ernst Mohamed a perde su pasenshi. E ta comparti cu Bon Dia cu nan ta hopi desapunta cu comportacion di e publico durante e debate.
Ayera nochi Camara di Comercio tabata tin nan di dos debate electoral na Grand Ballroom di Marriott Hotel. Desde inicio di anochi, un grupo di hende tabata keda interumpi e programa cada biaha cu e lidernan tabata contesta nan pregunta. E moderador di e anochi, esta Ruben Trapenberg, mester a keda dirigi su mes na e publico cu cada biaha tabata interumpi cu palabra di insulto of papiamento y harimento. “Mi ta sinti manera un maestro di scol atendiendo cu mucha chikito,” el a remarca na dado momento. Notabel tabata ta cu mayoria den sala tabata simpatisante di partido AVP y POR. Varios hende a wordo pidi pa bandona e sala, otronan cu a sali a bolbe drenta bek pa despues toch wordo pidi pa bandona e sala di nobo. Lider di partido ReD Ricardo Croes por ehempel a stop di contesta su preguntanan dos biaha na inicio pa via interupcion cu tabata tin.
Camara di Comercio desapunta
E director di KvK ta splica Bon Dia: “Nos a organisa esaki pa duna e pueblo un plataforma pa nan wak pa ken nan ta bay vota dia 22. Ora nos ta papia pa respet pa otro, mi ta haya cu ta hopi desapuntante cu bo ta haya hende den publico eynan sinta ta keda stroba otro candidatonan di pone nan punto.” E director a pidi su disculpa cu na final di anochi el a perde su cabes: “Ora cu hende ta keda haci fastioso, na dado momento bo tin cu bisa hende manera cu e ta,” e ta splica Bon Dia.
Confusion
Riba rednan social nos por a tuma nota varios comentario di comunidad entre otro cu e preguntanan y debate den general a genera poco confusion. E director ta splica nos cu e biaha aki e partidonan a manda preguntanan pa otro partido. “Nos a duna tur chens pa no ta Camara di Comercio so por haci e preguntanan, nos tur por haci e preguntanan na otro cual por a mira den e segundo tanda. Na e prome tanda nos a pone e ponencianan cu pueblo a manda:kico nan kier tende di e diferente partidonan. Esey nos a pone e biaha aki den uzo. E ponencianan di debe nacional, cuido medico, tur esey nos a pone pa nan debati y nan a haya e ponencianan y nan por a studia pa wak con nan ta bin cu nan contestanan. Pa nan ta prepara pa e pueblo haya un bon oportunidad pa tuma un decision”, sr. Mohamed ta bisa Bon Dia.
