Camara di Comercio di Aruba (KvK) a yega di expresa su preocupacion riba e decision unilateral di e gobierno di Venezuela di cera nan frontera maritimo y aereo cu Aruba.

Miembro di e directiva di KvK, Agu Croes a laga sa cu mirando e situacion aki cu Venezuela pa desaroya nos propio sector di agricultura, haciendo uzo di tecnologianan moderno. Den pasado KvK a yega di anuncia cu ta existi un gran interes di nos empresarionan y specialmente e empresario jong pa bay den direccion di e sector primario aki.

E ta haya cu cualkier persona cu kier bay riba e tereno di agricultura ta importante pa nan educa y adkiri conocemento. E otro punto ta si tin red type of obstaculonan ta bon pa cuminsa elimina nan. Si tin tereno disponibel y ideal pa agricultura enbes di bin cu proyectonan di construccion, ta bon pa tene esaki na cuenta pa uza locual nos tin na nos bentaha. “Mirando cu Aruba ta asina chikito si nos ta sigui construi riba terenonan cu ta fertil pa agricultura tambe nos ta cortando nos nanishi”, el a bisa

Ariba nan white paper bou e titulo Developing the commercial playground for Aruba, cu KvK a entrega Gobierno di gabinete Wever-Croes y tambe na Gobernador di Aruba, nan a bin den detaye entre otro puntonan pa fomenta agricultura. Sr. Croes a bisa cu ‘specialmente mirando e situacion cu nos bisiña, ta e momento pa bay mas den agricultura pa nos supply nos mesun hendenan’.

Otro punto cu KvK ta preocupa riba dje ta e situacion di nos dump cu ta yenando cada bes mas. No solamente cu e dump oficial na Parkietenbos pero tambe esunnan ilegal rond di nos isla. E ta kere cu a yega e momento tambe pa cuminsa separa sushi y te hasta probecha di e productonan cu e trabou di recicla nan ta trece cu ne.

Conocemento y awa
Sr. Croes a indica cu tin varios sector cu ta hunga un rol pa e sector di agricultura por ta exitoso na Aruba. E prome punto tin di haber cu conocemento, experticio, y otro tambe riba costo di awa, ya cu e ta hopi costoso riba nos isla.

KvK a yega di reuni cu Santa Rosa cu ta e departamento encarga cu agricultura, cria y pesca pa wak si nan ta interesa pa bin cu e suministro di conocemento. Sinembargo sr. Croes a bisa cu KvK ta den un fase di inicia mirando cambio di gobierno y di reglanan, nan ta purba di yega na un consenso pa logra e meta aki no solamente pa KvK, sino pa Aruba den general.

E ta haya cu tin varios alternativa pa atende cu e uzo di awa pa agricultura entre nan cantidad di awa cu nos mes ta uza ta bay lama. Ta awanan cu nos por recicla pa medio di tecnologia pa logicamente e tin su costo.

Tereno
Riba e falta di tereno adecua pa agricultura, KvK no ta wak esaki exclusivamente un problema pero si un necesidad. Ya cu tin diferente aspecto cu por yuda te hasta e material cu ta wordo benta den dump mes pa condiciona terenonan y haci nan mas productivo pa agricultura. E ta haya cu si por separa locual ta material organico, e por wordo uza pa adecua tereno cu no ta asina fertil y uza nan pa cierto cultivo cu si por crece den e tipo di tereno ey, manera papaya cu por crece den tereno cu tin hopi klei y calichi.

Segun sr. Croes ainda ta falta mas cooperacion entre e diferente partnernan pa haci e trabou mas facil. Esaki ta loke tambe KvK kier pa ‘inspira tur hende pa nan participa y no laga ideanan aki como trapinan halto pa subi’.

Aunke tin empresarionan y/of companianan local dedica na e sector di agricultura, sr. Croes a bisa cu e no tin mucho informacion personal riba nan facilidadnan y con bon nan ta bende. Pero tambe ki espacio e crisis entre Venezuela y Aruba a presenta pa nan negoshi. Kiermen pa nan por abastece mas nos mercado local cu normalmente. E crisis aki ta bayendo caba pa casi un luna y Venezuela cada biaha ta amplia su blokeo riba nos isla pa tempo indefini.