Camara di Comercio y Industria (KvK) a tuma nota di e comunicado di Gobierno di Aruba, caminda cu Minister Xiomara Ruiz-Maduro a indica cu e ciudadano y negociantenan ta contento cu BBO/BAZV y BAVP lo no aparece mas riba recibo. E punto aki sigur no ta cuadra cu loke e gremionan comercial, den nomber di e comerciantenan local di tur sector di nos economia, ta bogando p’e pa lunanan caba.

A dirigi un carta pa Gobierno y Parlamento for di december caba encuanto e topico aki. E comerciante contrario na e ponencia di e minister, kier mira cu tin transparencia riba e recibo y esaki kiermen cu BBO/BAZV y BAVP mester aparece riba e recibo pa tur hende por wak e total cu ta cobra pa benta di servicio y producto hunto cu e impuesto. Kitando e impuestonan aki for di e recibo ta trece desconfiansa y ta haci cu Aruba lo mustra mas caro en particular pa e turista. Tampoco por sa cuanto a hisa e prijs pa cubri gasto di BBO/BAZV y BAVP. E impacto ta afecta turismo y imagen di Aruba y lo crea e impresion cu costo di bida na Aruba ta mas halto. Tanto local como turista ta indica esaki caba. E impuestonan y primanan social cu a subi recientemente a disminui e poder di compra y haci bida na Aruba mas caro.

Den esaki mester aclaria tambe cu despues di keda insisti hopi cu gobierno pa no implementa e propuesta di sconde BBO den e prijs, Gobierno a bin cu un otro propuesta pa extende e periodo di implementacion cu 3 luna. Mester keda bon cla si cu e meta final cu e gremionan kier logra ta keda cu BBO/BAZV y BAVP mester keda aparece riba recibo. Hasta e proximo fase fiscal a keda anuncia y den consulta cu gremionan.

Comerciantenan no ta di acuerdo y ta malcontento cu e propuesta di ley nobo di impuesto di december, pasobra e no ta duna transparencia y e consumidor lo bay cuestiona e prijsnan. Encuanto e decision, den un reunion cu Gobierno, KvK a conseha Gobierno caba pa semper busca conseho di esunnan cu ta wordo afecta y asina yega na trece solucionnan practico y transparente pa pueblo y e sector priva por carga, segun comunicado di KvK.

Den rueda di prensa di Camara di Comercio y Industria ayeratardi, presidente Kawish Misier a elabora mas riba e punto di bista cu KvK ta comparti cu otro gremionan empresarial, mirando e declaracion conhunto cu a emiti siman pasa. Entre otro el a referi na e comunicacion bastante dificil cu e minister encarga cu finanzas. E ta memora cu ta apenas dos biaha a reuni cu e mandatario, mientras cu e ultimo encuentro ta como un aña pasa caba.

Na e altura aki ta tumando accion riba e asunto di e BBO riba factura si of no, pero ta pendiente tambe pa haya claridad riba e tema importante di e tipo di impuesto cu finalmente lo mester bin na vigor proximamente, dia 1 di juli, y no tin nada conoci ainda kico e ta bay bira y si acaso ainda ta bin cu anuncio. Esaki segun Misier no tin nada di haci cu e transparencia y bon comunicacion cu a priminti un aña y mey pasa na inicio di e gabinete aki, pero den practica no ta mira nada di esey.

Ademas cu a priminti cu e medida di BAVP lo ta algo temporal y ya por cuminsa mira cu e ta bira algo structural,