Diasabra ultimo, 30 di januari, Camara di Comercio y Industria (KvK) a organisa un ‘Startup day’ unda cu a ofrece e oportunidad pa personanan interesa registra nan negoshi. E intencion di e ‘Startup day’ tabata pa facilita e futuro empresario cu e procedura di registracion di su negoshi riba un dia mas flexibel unda KvK a dedica completamente na e parti di registracion. Ademas di baha e cantidad di citanan reserva via e sistema di cita online, e dia aki a sirbi tambe pa duna un chens na personanan cu kisas ta ocupa durante dianan di siman.
Pa e dia aki tambe KvK a haci uso di cita reserva di adelanta y a controla e documentonan rekeri hunto cu pre-aprobacion di e nomber di negoshi pa un proceso mas lihe y eficiente. E diasabra mainta a ser hopi bon bishita y diferente persona a haci uso di e oportunidad brinda unda a logra registra varios negoshi den apenas mita dia. Cu e ‘startup day’ personanan a probecha tambe pa ricibi ayudo y completa e proceso bou guia di e team di KvK. Esunnan cu a presenta pa registra nan negoshi a wordo asisti tambe pa crea nan cuenta digital ‘MyChamber’, ya cu tur registracion di negoshi (eenmanszaak/VOF, entre otro) ta wordo procesa atraves di e plataforma digital ‘MyChamber’.
KvK sigur lo ripiti e ‘Startup day’ den un futuro cercano y lo sigui organisa mas evento cu e meta pa informa y stimula empresario y tur persona interesa pa habri su negoshi y asina haya mas conocemento cu ta importante pa un bon maneho.
