KVK a informa ariba cambionan importante cu introduccion di buki dos di codigo civil

Ayera durante un conferencia di prensa di Camara di Comercio (KVK), presidente di KVK, Sr. Martijn Balkenstein a informa tocante e cambio- y consecuencianan cu tin pa tur negoshi cu introduccion di e buki dos di codigo civil y di e ley LWTF.

Balkenstein a recorda cu e introduccion di buki dos di codigo civil ta trece consecuencia amplio pa tur comerciante. El a indica cu esaki ta trece cambio, entre otro, pa fundacion, asociacion, AVV y e doñonan di compania cu mester registra nan mes den e UBO register.

El a remarca cu tur entidad legal, incluyendo fundacion tin e obligacion legal pa registra nan mes na e registro di negoshi di KVK.

Desde e aña aki e registro di fundacion ta forma parti di e registro di negoshi di KVK. El a indica cu fundacionnan cu ya caba tabata registra den e registro di negoshi di KVK prome cu januari di aña 2021, no mester registra nan mes di nobo cerca KVK pasobra e migracion di nan data a bay automaticamente y ya caba e informacion ey ta den e registro civil.

El a splica cu e ley di buki dos di codigo civil tambe tin cambio pa asociacionnan. E buki aki ta haci un distincion entre asociacionnan cu tin autoridad legal completo y asociacionnan cu tin autoridad legal limita.

Balkenstein a sigui splica cu asociacionnan cu tin autoridad legal completo ta wordo constitui via un acta notarial. E asociacion ey por tin mesun derecho y contrae debe manera cualkier ciudadano. El a señala cu por ehemplo nan por adkiri un propiedad registra of por ta un heredero di un propiedad. Den e caso aki e asociacion mes ta responsable pa tur cos cu e organisacion ta haci, cualkier debe, y e dirigentenan en principio no. E asociacionnan aki tin e obligacion pa inscribi nan mes e aña aki den e registro di negoshi di KVK.

Pa loke ta trata e asociacionnan cu tin autoridad legal limita, esakinan no ta wordo constitui via un acta notarial y nan no por adikiri propiedad registra y nan no por hereda propiedad tampoco. Pero loke ta hopi importante, Balkenstein a enfatisa, ta cu e dirigentenan ta personalmente responsable pa cualkier debe cu e organisacion ta haci, locual ta un risico. E risico aki, el a agrega, por wordo limita na momento cu e asociacion ey ta inscribi su mes na Camara di Comercio.

Balkenstein a indica cu buki dos di codigo civil tin consecuencia tambe pa AVVnan (Aruba Vrijgestelde Venootschap). El a remarca cu AVV cu ta activo mester converti den un otro forma huridico, sea un VBA por ehemplo of NV y pa e AVVnan cu no ta activo mas, nan mester wordo disolvi door di Camara di Comercio.

E cambio aki pa AVV, el a splica, tin di haber cu rekisitonan internacional cu no ta permiti mas pa AVV ta existente. El a indica cu tin acutalmente 93 AVV cu ta activo y a haci un yamada urgente na e doñonan di e AVVnan pa via notario cambia den un otro forma huridico pa evita cu proximo aña KVK ta disolve e AVVnan cu ta activo.

Balkenstein a resalta cu tin mas cu cuater mil AVV cu no ta activo y KVK tin e obligacion di disolve nan. Pa disolve un AVV cu no ta activo tin cierto condicion ta aplicable. Por ehemplo nan nota paga nan contribucion anual, nan no a deposita nan cuenta anual, kizas e directiva no ta conoci mas pa varios aña of e compania mes no por tuma contacto cu nan mas cu e informacion cu den e registro. Si tin dos of mas condicion cu ta aplica, KVK tin e obligacion pa disolve tur e AVV.

Balknestein a menciona cu tin un otro ley cu tambe a drenta na vigor na januari di e aña aki, cual ta e LWTF cu ta contra labamento di placa y financiamento di terorismo. Cu esaki tambe tin cierto cambio cu ta bin cu e ley aki.

Entre otro e implementacion di e UBO register. El a splica cu UBO (Ultimate Benefeciary Owner) ta e persona cu na final ta beneficiario of esun cu por tuma deciscion den un compania, fundacion of asociacion. Esaki ta personanan cu tin 25% of mas di e accionnan di e bienes di un empresa.

El a agrega cu e cambio di e ley aki tur entidad huidico, compania, fundacion y asociacion tin e obligacion di registra nan UBO, nan doño, den e registro di KVK y e obligacion di e registracion ta cay riba e director of e doño di e compania.

Entidadnan cu no tin e obligacion di regsitra na UBO, ta een persoon bedrijven, asociacion cu autoridad legal limita y asociacion di propietario.

El a indica cu UBO nan di companianan nobo,despues di januari 2023, ta wordo regsitra via notario y otro companianan cu ya caba tabata activo mester registra nan UBO via un formulario online.

Por ultimo e director di KVK a recorda cu Camara di Comercio lo tene su eleccion di directiva proximo luna. El a splica cu tin nuebe miembro di directiva y cada aña tres di e miembronan aki su puesto ta bira disponibel pa miembornan nobo drenta e directiva.

El a remarca cu Camara di Comercio tin e responsabilidad pa reprsenta entre otro e interes di e empresarionan na Aruba y den e rol ey ta sumanente importante pa e miembronan di directiva tin conocemento di e comercio y economia y di con gobierno ta opera.