ORANJESTAD – Hefe di Kustwacht di Aruba, Randy Paskel, a declara cu e situacion di Venezuela tin su debido atencion di parti di e cuerpo aki. Sinembargo, su intencion no ta pa crea panico, pero e situacion no ta uno normal.
Nan alerta ta hopi halto den nos costanan pa evita cu cualkier eventualidad por tuma luga. Nan ta controlando nos costa pa evita e introduccion di persona indocumenta y e transporte ilicito di arma y di droga.
Nan ta operando hopi estrecho cu e fragata di marina Hulandes cu ta nabegando den nos lama teritorial, y tambe personal di marinierskazerne cu ta sostene nan, y tambe cu polis. Constantemente nan ta den contacto cu otro instancianan tambe, manera duana, migracion, warda nos costa, etc… Di e forma aki, conhuntamente Aruba por protege su frontera mas strictamente posibel.
Tambe kustwacht tin su helicopternan cu ta bula pa tene un bista for di aire. Tur e esfuersonan conhunto aki ta yuda pa cera e frontera debidamente.
