E acuerdo pa para lucha arma den nort di Siria a cuminsa cu acusacion di parti di e forsanan Kurdo cu Turkia lo no ta cumpliendo y ta sigui ataca cerca di un ciudad na frontera, mientras ta surgi duda tocante cierto aspecto di e acuerdo entre Turkia y gobierno di Trump.
Presidente di Turkia Erdogan a adverti cu forsanan Turco lo bolbe ataca dentro di cuatro dia, a menos cu e milicianan lidera pa Kurdonan retira “sin excepcion” di un zona di 20 miya den teritorio di Siria, a lo largo di henter e frontera entre ambos pais.
Sin embargo, no tabatin ningun señal di salida di e forsanan Kurdo. Nan ta bisa cu e acuerdo ta cubri un porcion menor di e frontera, como 125 km y cu nan no a compromete pa sali di ningun lugar.
Tin combatiente cu a dicidi di no retira, yamando e acuerdo un “insulto pa dignidad Kurdo” y igual na un rendimento total aregla pa Merca, e aliado anterior cu a bandona nan y laga nan na merced di e asalto Turco.
E gobierno Kurdo auto-proclama a bisa cu cierto stipulacion di e acuerdo pa para hostilidad arma “mester mas discusion cu Merca” aunke no a specifica kico. Un politico experimenta Kurdo, Ilham Ahmed, lo ta na Washington durante fin di siman pa topa cu funcionarionan Mericano.
E acuerdo entre Erdogan y vice-presuidente Pence ta rekeri cu e Kurdonan ta sali di e teritorio cerca di frontera, loke ta implica cu e Kurdonan mester cede teritorio di nan pais (Siria) na Turkia, loke ta haci cu sin sigui bringa, Turkia lo a logra su meta.
Critica pisa a surgi despues di e ‘deal’ cu presidente Trump a cera cu Turkia, yamando e logro “un gran dia pa civilisacion.” Presidente di Conseho di Union Europeo, Donald Tusk, a bisa cu e no ta un alto al fuego, sino un demanda pa capitulacion di e Kurdonan” y a haci un yamado na Turkia pa para nan operacion den teritorio di Siria inmediatamente. Presidente Emmanuel Macron di Francia a yama e operacion Turco “un locura.”
