Presidente Pedro Pablo Kuczynski, lo reuni awe cu su colega di Merca, Donald Trump na Cas Blanco durante un bishita oficial na Merca desde dia 23 te dia 27 di februari, Fernando Zavala, prome Minister di Peru a informa.
E presidente di Peru ta e prome gobernante Latino cu ta bay reuni cu Trump, desde cu el a sinta den presidencia na Merca. Durante e reunion ey, nan lo papia tocante relacion di Peru y Merca, programa di asistencia y cooperacion den lucha contra trafico di droga, hefe di gabinete a destaca.
Kuczynski tin bishita na e universidad di Princeton pa mañan diasabra planifica, caminda e lo duna un exposicion relaciona cu oportunidad comercial na Peru y lo haya un reconocemento special cu e condecoracion di e medaya di James Madison. E hefe di Peru lo reuni cu Antonio Gutierres, Secretario General di Nacion Uni tambe, esaki cu obhetivo di intercambia opinion tocante situacion mundial y forma pa logra e obhetivo di desaroyo sosteni.
Kuczynski, casa cu ciudadano Mericano Nancy Lange, a renuncia su nacionalidad Mericano prome cu eleccion pa presidente di aña cu a pasa. Na periodo ey Kuczynski, a saca bentaha den di dos buelta dilanti di e candidato Keiko Fujimori. E bishita di Kuczynski na Merca ta den un momento dificil, caminda husticia di Peru ta na expectativa dilanti posibilidad cu autoridad di Merca por detene preventivamente na ex presidente di Peru Alejandro Toledo (2001-2006), cu a wordo denuncia pa haya supuestamente un soborno di 20 miyon dollar di empresa di Brasil Odebrecht.
Toledo ta biba na San Francisco cu su casa Eliane Karp, y eynan e tin relacion di trabao cu departamento di investigacion di Universidad di Stanford.
