Presidente di Peru, Pedro Pablo Kuczynski a plantia un acuerdo cu ta purba di agrupa paisnan di Asia – Pacifico, den mesun termino y condicion di comercio liber, como un solucion despues cu Merca a sali di negociacion di e Acuerdo Transpacifico di Cooperacion Economica (TPP). Nos mester traha hunto cu China, y otro paisnan di Asia, India, Australia, New Zealand y purba di forma e grupo APEC – Pacifico, cu por yega te India y asina nos por involucra tur pais. “Nos kier tuma e cos cu tabata bon di TPP, pon’e hunto y saca tur cos cu tabata malo di TPP afo”, Kuczynski a bisa.
“Mi ta apoya e comercio liber pasobra Peru por logra beneficionan. Nos a siña hopi di tur eror cu a sucede cu caso di Merca y Mexico na NAFTA (tratado di comercio liber di Noord America)”, Presidente di Peru a indica.
Minister Eduardo Ferreyros, a afirma cu e sistema di exportacion no lo wordo afecta, pero asina mes nan ta busca pa reuni cu hende, cu ta representante di 11 economia cu ainda ta falta eyden. Nos no por lubida cu e acuerdo aki tabata planifica pa cuminsa na 2018, y cu nos tin tempo ainda pa tuma tur cos cu calma, papia cu nos socionan comercial y logra e miho resultado posibel den e proceso aki”, Ferreyros a bisa. Tambe e prome minister di Australia, Malcolm Turnbull, a bisa cu el a discuti e futuro di e pacto ey cu Hapon, Singapur y New Zealand y nan a conclui cu e acuerdo por sobrevivi. E salida di Merca ta un perdida, pero nos no ta bay lubida nos compromiso di crea cupo di trabou nobo na Australia, Malcolm a comunica. El a propone tambe pa un posibel entrada di China den TPP. Hapon a califica di “sin sentido” e posibel acuerdo sin presencia di Washington, pasobra awo e balansa a perde tur ekilibrio, pa tal motibo el a presiona tocante posibilidad di convence Trump riba bentaha di tin TPP, , Koichi Hagiuda vice vocero di Hapon a sugeri.
TPP a wordo firma na 2016 pa 12 pais, cu ta representa 40% di economia mundial y un tercera parti di e fluho di comercio alrededor di mundo.
