Kralendijk: Crisis di coronavirus ta afecta fundaciony organisacionnan ‘non-profit’

E medidanan pa evita plamamento di coronavirus tin un impacto serio riba economia di Boneiro. Esaki ta un sla pa no solamente empresarionan. Fundacionnan y organisacionnan ‘non-profit’ tambe ta experencia momentonan dificil.

Fundacionnan tin un contracto di cuido cu Gobierno y ta ricibi subsidio. Ya pa varios aña ta corta den subsidio di fundacionnan. Locual ta trece un buraco den e finansa di e fundacionnan. Un buraco quo den e situacion actual ta peligro nan existencia.

Scol di baile, Dance Sensation Foundation, ta un organisacion non-profit cu tambe ta pasando den momentonan dificil. Nan grupo di enfoke ta entre otro hobennan di menos recurso.

“Te cu awor nos a sobrevivi paso nos a trata na diferente manera creativo pa yena e buraco financiero. Pero e situacion di virus di corona ta pone cu awor esaki ta casi imposibel”, Angele Cecilia fundado di scol di baile ta bisa. Esaki ta segun e fuente Retkaribense.

Añanan di subsidio incompleto.
Segun Cecilia, e scol di baile tin añanan ta ricibi subsidio incompleto di gobierno. Esaki ta trece preocupacion financiero cune. Nan a papia cu diferente gobierno na turno pero sin resultado.

“Nos a papia cu tur e diputadonan concerni, pero sin nunca haya un contesta cla. E diputado actual, Nina Den Heyer a bisa cu no tin cen. Parce cu fundacionnan no ta prioridad di gobierno”, Cecilia ta bisa.

Mester di procedura transparente.
“Nos no ta pidi hopi. Solamente pa completa e montante cu a corta den e subsidio. Y tambe nos ke pa gobierno bini cu un maneho y procedura transparente. Duna claridad pa ki motibo ta corta den e subsidio”, Cecilia ta accentua.

Pa completa e subsidio, e scol di baile mester di casi nuebe mil dollar extra pa luna. E suma aki ta necesario mirando cu nan entrada di contribucion di mayornan a baha. Hopi mayor cu tabata labora den sector turistico a perde trabou y sin entrada nan no por contribui.

Gobierno ta haciendo investigacion.
Diputado Den Heyer ta consciente di e situacion agudo di algun fundacion. “Den 2018 e gobierno anterior a corta den subsidio di fundacionnan. Nos ta haciendo investigacion pa wak si mester adapta montante di subsidio.

Awor cu ta aliviando medidanan pa cu e virus di corona por haya mas claridad di e daño pa organisacionnan.
Tocante e situacion di scol di baile, diputado ta reacciona: “ Mi no ta kere cu gobierno lo beneficia si nan cera porta. Nos lo wak ki posibilidad tin.”