KPA y MSK ta anuncia un cooperacion nobo

Ayera merdia a tuma luga un conferencia di prensa na Marieniers Kazerne, na unda Comandante di Mariniers Kazerne (MSK), Tim van Wijk y Alto Comisario di Korps Politie Aruba (KPA), Ramon Arnhem a anuncia un cooperacion nobo entre KPA y MSK.

Durante e conferencia tanto Alto Comisario Arnhem como Comandante Van Wijk a expresa nan satisfaccion cu e acuerdo di cooperacion entre e entidadnan. Ambos a enfatisa cu e meta di esaki ta pa traha na bienestar y mehoracion di seguridad di pais Aruba y explora e tur e posibilidadnan di cooperacion entre KPA y MSK.

Pa loke ta e expectativanan di e acuerdo di cooperacion nobo, Comandante Van Wijk a indica cu tanto polis como e mariniernan ta traha pa e defensa di Hulanda y esaki ta nifica cu nan ta socionan di seguridad na servicio di Aruba y cada un den su perspectiva. El a remarca cu mas cu claro tin diferencia entre e entidadnan, pero tin similitud tambe y e similitudnan ey nan kier enfatisa y esey ta loke nan kier cuminsa haci for di awo.

Di parti di KPA, Alto Comisario Arnhem a splica cu nan tin un strategia y e strategia ta bay ta enfoca riba buskeda y reconocemento di e coalicionnan di seguridad nobo y existente. Segun el a indica, e acuerdo di cooperacion nobo ta un coalicion di seguridad existente cu nan kier rebiba y ambos entidad tin e mesun meta pa loke ta trata servicio na pais Aruba.

“Naturalmente e lo ta miho y mas efectivo si nos fortalece otro mutuamente. E forsa naval di defensa ta un partner di colaboracion fantastico, cu bunita experticio, bunita recurso y ekipo, y cu posiblemente lo por yuda combati criminalidad y mas.” el a remarca.

Pa loke ta trata e diferencianan entre e cooperacion anterior y e acuerdo di cooperacion nobo, kico por haci awo cu no tabata por haci prome, e Alto Comisario a splica cu pa loke ta trata seguridad, e aspecto di rond di frontera di lama, combati e ingreso di substancianan y material prohibi y otro formanan di criminalidad cu e experticio cu MSK tin specificamente riba e tereno aki nan lo steun riba dje.

“Asina por ehempel nos lo hacie, pero ainda nos ta explorando, y esaki nos ta hacie semper, mi kier enfatisa, den consulta cu e autoridadnan concerni y entre nos mes, pa wak con nos por traha hunto por ehempel na e frontera maritimo pero tin tambe den e area di educacion y training,” el agrega.

Dia di 1 mei e opendag di MSK ta regresa despues di tres aña. Comandante Van Wijk a indica cu di parti di MSK, esaki tabatin di haber completamente cu e pandemia di COVID-19 y el a agrega cu kizas tambe e tiki cooperacion cu tabatin te cu aworaki entre KPA y MSK tabatin algo di haci cu COVID-19. Pero mirando cu aworaki tur cos ta back na normalidad, nan kier celebra, di diferente manera, cu MSK por habri su portanan pa publico un biaha mas.

“Ta hopi bon cu aworaki, na momento cu nos por celebra e opendag un biaha mas, nos por celebr’e di diferente manera. Un di nan ta cu e opendag mes. Nos kier tin e pueblo di Aruba dentro di nos portanan atrobe pa demostra kico nos por haci. E otro forma ta traha mas frecuente y mas di cerca cu nos partnernan den seguridad y mas cu claro cu KPA,” el a señala.

Pa loke ta trata e leynan, dos ley diferente, concerni pa por haci e colaboracion aki funciona, Alto Comisario Arnhem a remarca cu e topico ey ta basta leu den futuro ainda y pa aworaki nan ta explorando cu otro ainda, pero cu e anuncio di e cooperacion nobo nan kier demostra nan intencion pa traha hunto. Con esey lo tuma forma, el a indica, ainda nan tin cu sigui investiga esey.

“Ta corecto cu ta trata di leynan diferente, pero tin algun coincidencia den algun area y mas cu tur cos nos kier wak unda e posibilidadnan ta pa e colaboracion aki por funciona,” el a enfatisa.

Tocante e acuerdo di cooperacion y con MSK lo respalda esaki, Comandante Van Wijk a ratifica cu e colaboracion cu nan kier impulsa, y for di parti di e defensa, e lo ta un defensa di apoyo y lo ta riba peticion y direccion di polis.

Por ultimo, e Alto Comisario y Comandante a extende nan invitacion na pueblo di Aruba pa asisti na e opendag di Mariniers Kazerne cu, manera custumber, lo tuma luga riba dia 1 di mei.