Pa KPA (Cuerpo Policial di Aruba) e uzo di tecnologia digital a bira un instrumento valioso pa realisa nan investigacion.
Recientemente te hasta Ministerio Publico (OM) a laga sa cu nan investigacion riba e caso controversial di corupcion tocante dunamento di permiso, unda minister Paul Croes a keda envolvi como sospechoso, a start a base di informacion obteni for di social media.
Comisario di Polis Trudy Hassell kende ta organisando un conferencia internacional riba Globalisacion y Crimen Organisa Transnacional, a declara cu hopi hende ta kere cu nos cuerpo policial ta cana atras riba e tereno aki. Sinembargo durante hopi aña, KPA ta enfoca hopi riba tecnologia y “con tecnologia por forma base pa nos investigacionnan den cuerpo policial.
E uzo di e tipo di instrumento aki ta un tendencia internacional den e tipo di cuerpo uniforma aki, unda nan ta inverti hopi den tecnologia “pa asina nos por cana conhuntamente cu organisacionnan criminal cu tambe ta inverti den tecnologia”. Nan intencion ta cu polis por cana mas adelanta cu e organisacionnan criminal. P’esey tin companianan cu ta desaroya e tecnologia pa garantisa siguridad y nan partnernan policial pa asina yuda nan organisacion.
Sra. Hassell a laga sa cu pa tal motibo Asociacion Internacional di Hefenan di Polis (ACCP) ta biniendo cu e conferencia aki for di 1 te cu 5 di mei proximo na Aruba Hilton Resort. Den cuadro di esaki lo bay tin un exposicion di compania grandi mirando e importancia y uzo di digitalisacion y social media riba tereno di investigacion hudicial. “E exposicion aki ta bay ta uno sumamente interesante ariba tecnologianan moderno cu tin”, el a bisa. Nan ta bay haci demostracion di algun di e tecnologia na servicio di cuerpo policial den su lucha contra delincuencia.
