ORANJESTAD – Korps Politie Aruba a duna di conoce cu e dia di ayera y awe, desde 8or di mainta te 3or di atardi, e proyecto ‘Kijkdag’ lo tuma luga na e warda di Santa Cruz, cu permiso di Mando Policial.
Sr. Lito Lacle a splica cu esaki ta un iniciativa cu nan ta organisa pa haci full limpi e luga di warda di Santa Cruz, cu na e momentonan aki ta yen di auto y brommer cu a confisca na diferente operativo, manera infraccion den trafico of otro.
Bon Dia Aruba a observa cu tambe por a mira potchi di matanan di marihuana cu a ser confisca tempo pasa, e obhetonan ey a ser hiba na Centro di Agricultura Santa Rosa.
El a informa cu nan a haci un yamado pa tur persona of doño di auto pa acerca warda di Santa Cruz cu e comprobante cu ta señala cu nan mes ta e doño di e auto, y nan lo por bay cune, nan mester paga un suma di 175 florin so.
Lacle a bisa cu esaki ta e prome fase, despues KPA lo bay haci e yamado un biaha mas, si e vehiculonan cu di un of otro manera no por haya e doñonan, despues di e dianan aki nan lo por aplica e artikel 31 lid 2 di ‘Het Landsverordening wegverkeer’, cu ta encera cu vehiculonan cu tin mas di 3 luna (90 dia) para na Warda Di Santa Cruz, Cuerpo Policial por deshaci di nan.
Tambe el a señala cu e motibo di e ‘Kijkdag’ ta pa nan siguridad mes, pa motibo cu nan tin hopi auto na warda ey, y e personanan deteni ta na e mesun luga, y esey lo por ocasiona problemanan grandi den futuro.
Lacle tambe a expresa cu e persona encarga di e proyecto aki ta e Onderinspecteur Rodney Solognier. Nan ta haci den e districto di Santa Cruz y despues nan lo sigui na otro districto. Cu e proyecto aki, hende tin un chens di por busca nan auto pagando e suma ey, pa motibo cu pa dia e suma ta di 25 florin, y el a sigura cu hopi di e autonan cu ta na e luga tin mas di tres luna.
