Alto Comisario di Cuerpo di Polis di Aruba, Vanessa Tjon-Kock a ofrece un conferencia di prensa diahuebs atardi pa duna di conoce cu te ayera dos agente di polis a wordo contagia di coronavirus y cu no ta descarta cu por tin mas contagio den e departamento aki.

El a sigura cu polis tin un tarea hopi importante pa comunidad, pa garantisa tur hende su siguridad na e momentonan aki y cu no por lubida riba e siguridad di nan propio coleganan. Pa e mesun motibo aki el a bisa cu ta bay tin medidanan y reglanan hopi estricto pa nan comunicacion y tambe pa cu nan servicio pa publico.

Di mesun manera, el a trece dilanti cu esaki no ta significa cu nan no por duna servicio, pero mester tene na cuenta cu pa siguridad di nan propio coleganan nan mester haci esey.

El a indica cu ora un ciudadano lo tin cu dirigi pa algun warda di polis of un recherche bureau nan mester bisti mondkapje, pa motibo cu ta importante pa entrega un keho of si mester tin contacto cu un miembro di cuerpo policial. Ademas a facilita nan coleganan material necesario pa asina nan por proteha nan mes.

Tjon Kock tambe a señala cu aworaki nan tin bon contacto y acuerdo cu Departamento di Salud Publico (DVG) pa wak con nan ta sigui cu nan organisacion y con ta sigui draai pa duna servicio manera mester ta.

“Nos ta pidi pa comunidad compronde e situacion, cu ta un scenario hopi realistico mirando e cantidad drastico cu ta confronta aworaki cune”, Tjon Kock a bisa.

Di loke ta trata e aumento di casonan na Aruba, polis a wordo contagia y esaki pa nan ta fastioso pa via cu tin biaha cu nan no por mantene nan mes na distancia cu otro. Pero nan si tin un tarea cu nan mester cumpli cu ta siguridad di Aruba completo den temporada di crisis aki.

El a manda un mensahe pa henter Cuerpo di Polis pa nan por keda trankil, pa motibo cu Tjon Kock a sigura cu nan tin acuerdonan y cu Tjon-Kock tambe a comunica esey pa nan y asina sa kico ta e acuerdonan aki cu DVG, con nan ta cu e situacion, mirando cu cuerpo policial ta keda cu un responsabilidad hopi grandi na e momento cu e ta papiando di e contagio di e malesa aki den cuerpo policial.

Manera a informa caba, te ayera atardi tabatin e cifra di dos agente di polis contagia. Pero algun di nan a haci e test mirando e cantidad di caso cu a keda conoci, por ehempel agentenan cu ta traha na warda di polis di districto Noord.

Den su plannan activo, Tjon Kock a expresa cu desde e momento cu a registra un agente contagia no ta importante pa sa na unda el a traha sino cu nan y ciudadanonan mes mester mantene na e reglanan di higiena. El a informa cu autonan di polis tambe ta drenta den protocol di higiena.

Na e momento cu un polis ta drenta accion y tin cu detene un persona, polis tambe mester bisti di handschoenen y mondkapje. Tjon Kock a comenta cu den e parti aki nan tin gruponan prepara cu detencion na diferente warda di polis, pero mester mantene nan mes na e reglanan pa protege nan mes. “E no ta bay pa proteha a mi, e ta bay pa proteha nan mes y nan famia ora nan ta bay cas”.

Di e gruponan special cu tambe mester haci cierto detencionnan, el a menciona cu ya caba nan protocol y nan procedura tambe ta ‘in place’.

Di loke ta trata control mas estricto y algun otro desaroyonan, el a comenta cu pa loke ta trata e crisis team, esaki ta un situacion hopi critico. E situacion ta mas serio di loke hende ta kere y ta p’esey polis ta keda cu e tarea dificil, como orden publico. Y esunnan cu tin e tarea di cera luga, ta bay keda e task force cu tambe lo sali haci su trabou y ta consisti di polis. Mester tene na cuenta cu den un organisacion como esaki nan mester tuma den cuenta e hende vulnerabel y esey tambe ta puntonan cu nan ta tuma na momento di decisionnan.

Di loke ta trata e situacion cu a sucede cu algun restaurantnan cu a wordo cera mas trempan cu e orario di ciere pa cuerpo di polis na area di Palm Beach algun dia pasa, Tjon Kock a expresa cu nan a haya hopi critica. Pero manera el a splica “hopi di nos no ta realisa kico a pasa diaranson ultimo, cu den un fraccion di seconde algun departamento a wordo contagia cu un cantidad grandi. Y mi no ta bay descarta cu esaki por bira mas grandi, mirando tur e desaroyo den dianan aki”, el a sigura.

Siguiendo cu e caso specifico aki, el a bisa cu na e momento ey, e crisis team a tuma e decision corecto pa bin cu cierto medidanan a base di leynan. “E no ta bay pa accion di polis a lo loco, nos ta haciendo conforme nos leynan prescribi. Ceramento di luganan e dia ey no tabata un eror”.

Tjon-Kock a trece dilanti toque de queda y pa cu esaki el a splica cu esey ta un di e medidanan cu, mesun cos cu shelter in place, ta un medida hopi drastico. Pero esaki ta bini na e momento cu e situacion ta pone pa aplica un medida asina. Esaki ta algo cu cuerpo policial so no ta dicidi sino cu crisis team lo por tuma; pero tur cos ta depende di e desaroyo cu tin actualmente, el a finalisa.