No ta un sorpresa cu durante transcurso di añanan durante carnaval e detencionnan cu ta cay ta bira mas den cantidad y ta hisa den intensidad. Esaki ta algo cu tambe Cuerpo Policial ta confirma den un relato cu nos a haya. Lo ta un bon momento pa refleha riba e manera con nos celebracionnan colectivo ta afecta tanto nos salud como aspectonan social di nos comunidad.

Segun un informe di Cuerpo Policial, e aña aki polis a habri Carnaval na e parada di flambeu 2018 cu 150 agente policial mobilisa cu den nan diferente unidadnan manera K9 Unit, Motor Unit, recherche, etc. Te hasta Cuerpo Especial Arubano a coopera pa transporta detenidonan na warda unda subfiscal tabata sinta warda pa ricibi e detencionnan. E imagen aki, cu subfiscalnan ta prepara caba wardando pa nan ‘clientenan’ yega cerca nan ta uno interesante. Na ki punto e expectativa cu cosnan ta bay fout durante periodo di Carnaval a bira asina comun?

Esaki no ta un punto pa critica Cuerpo Policial, pasobra e ta visibel cu e cuerpo ta haci nan esfuerso pa apart di percura pa ciudadanonan wanta nan mes na ley, ta haciendo esfuerso pa conscientisa comunidad tambe. Pero en fin e echo ta keda cu esaki ta un celebracion cu a bira parti di nos. E pregunta e ora cu nos ta haci como medio di comunicacion ta con nos a yega asina leu? Y kico nos lo tin di haci pa mira un Carnaval sin of cu un cantidad minimo di bochincheria? Pasobra si mester mira criticamente na e medidanan cu ta wordo tuma en contra personanan cu ta tuma e celebracion mucho leu, por ehempel por medio di bringamento, esaki no ta algo cu ta intimida personanan pa comporta nan mes di manera adecua.

Cantidad di detencion
Compaña pa muziek riba full blast e parada a yega na su final 2:15am unda e lastlap a drenta na ex-DOW na playa. E tabata un anochi unda cu polisnan a haya nan mes man nan yen cu detencion, segun Cuerpo Policial ta informa. Comportacion di publico e aña aki a resulta na un total di 24 detencion durante parada di flambeu. E suma a triplifica compara cu aña 2017 cu tabata tin solamente 8 detencion, segun e informe. ‘Ta di lamenta cu mayoria di e detencion ta pa personan bou influencia di alcohol of pa bringamento, personan cu tabata busca pa husticia of pa maneha auto bou influencia di alcohol’, e relato di polis ta comenta riba e detencionnan.

E punto ta uno importante: e cifra a triplifica, pues lo ta posibel cu ‘Faya bo haya’ ta fayando? E pregunta no ta pa tira culpa riba polis. Si no pa refleha un momento con nos sistema pero tambe nos hendenan ta comporta. Di e banda di e hende sigur un aspecto cu por causa inkietud pa nos lesadonan tabata cu e aña aki a nota hopi mayornan cu mucha chikito di apenas 0 pa 5 aña ta cana rond laat durante parada di flambeu. Sin proteccion y den zonido duro. Te hasta Cuerpo Policial a tuma nota di mayornan cu ta cana cu baby recien naci durante parada. Esaki ta un practica cu hopi riesgo envolvi pa ambos e mayor como e baby, segun polis.

Muchanan tambe ta cana hunto cu mayor
Pero mas cu claro e detencionnan no ta tuma luga solamente durante parada. Tanto durante como despues di parada Motor Unit a haci diferente control di trafico na unda 32 boet a wordo reparti di cual 2 a perde nan rijbewijs. Un di e personanan aki a surpasa e limite di alcohol y e supla 1035 ug/l, cual ta den rango di venenacion di alcohol. E boetnan tabata varia, entre otro: pasa den luz cora, core cu celular na man y no tin nan documentonan na ordo, segun polis.

Algun aspecto cu lo causa inkietud pa nos lesadonan tabata cu e aña aki por a nota hopi mayornan cu mucha chikito di apenas 0 pa 5 aña ta cana rond laat durante parada di flambeu sin proteccion y den zonido duro. Te hasta Cuerpo Policial a tuma nota di mayornan cu ta cana cu baby recien naci durante parada. Esaki ta un practica cu hopi riesgo envolvi pa ambos e mayor como e baby, segun polis.

Castigo ta wordo sinta pero no ta conscientisa?
“Ta di lamenta cu e aña aki e uzo di alcohol durante parada tin su consecuencianan y falta respet pa autoridad a pone cu hopi personanan a haya un camber pa pasa nan anochi y nan mester a paga un boet cu sumanan basta halto cerca polis.”

Podise e castigo ya caba ta uno halto, pero no ta algo cu ta pone personanan para keto na loke nan a haci. Esaki no kiermen cu mester bay subi e castigo necesariamente, si no posiblemente bin cu un rectificacion social unda por enfatisa e importancia pa colectivamente celebra di manera modera.

“Un biaha mas Cuerpo Policial ta haci peticion na comunidad pa celebra carnaval conscientemente. Sea responsabel. Faya bo haya ta na vigor!”, e relato ta conclui. Mas cu claro no por kita cu tin hende cu ta celebra carnaval conscientemente. Y aunke cu e grupito cu no ta haci esaki ta aparentemente creciendo cada aña, lo ta bon pa reconoce tambe esunnan cu ta celebra di manera respetuoso.

Di nos banda nos ta conclui cu un yamada pa refleha riba con Carnaval ta wordo festeha. No solamente pa celebra conscientemente pero tambe pa pensa riba con por mehora e celebracion.