John Larmonie di Departamento di Prevencion (KPA) ta splica Bon Dia Aruba cu no solamente hoben pero hopi adulto mes no sa kico e ‘lik-op-stuk beleid’ of e asina yama den pueblo ‘Faya bo haya’ ta encera. Riba esaki nan ta poniendo nan enfasis den diferente charla durante temporada di carnaval na scolnan pa asina ofrece mas informacion.
E siman aki algun departamento di gobierno a bay duna diferente tipo di charla na scolnan. Entre otro Fada y Departamento di Prevencion di Cuerpo Policial a bishita Ceque Mavo College na Hato.
Departamento di Prevencion a tene un charla riba e tema di carnaval y splicacion di e ‘Faya bo haya’. Segun sr. Larmonie: “E proyecto ta bayendo hopi bon. Na Ceque College nos a papia cu e muchanan, splica nan den detaye dos cos: con halto e castigonan ta y circunstancianan pa pag’e cual ta hopi dificil.” Esaki pasobra bo tin cu paga e multa aki di biaha of bay dilanti di hues pa despues e multa resulta di bira dobel. E multa aki ta acumulativo tambe. Normalmente, segun sr. Larmonie, ora bo haci diferente ‘strafbare feiten’ nan ta duna bo castigo di esun mas pisa anto e otronan nan ta laga cay. Den e caso di ‘Faya bo haya’ no ta asina: nan ta conta tur castigo hunto. Pues e resultadonan final di e multanan ta bira hopi halto.
Castigonan pisa
Sr. Larmonie ta splica cu e castigonan ta hopi pisa, e maneho ta hopi duro pa asina por evita problema den temporada di carnaval. Den pasado tabata tin hopi cosnan cu a bay malo den carnaval cu a produci demasiado detencion y te hasta morto. E maneho ta hopi strak segun sr. Larmonie pa asina wak si den e manera aki hendenan lo no bay comporta malo of contra ley den carnaval. Hopi hende cu no ta compronde con e ta funciona ta haya nan cu e mal sorpresa riba e parti di castigo. “Ora nos ta splica hopi biaha den prensa, hende no ta paga tino. Pues nos ta splicando e muchanan na scol pa nan compronde kico ta ‘Faya bo haya’ y avisa nan pa corda bay cas y splica nan mayornan.”
Charla
E charlanan ta consisti tambe di con pa evita droga y alcohol, abuso, kico ta pasa ora bo no sosega bon, con pa trata cu situacionnan fastioso den carnaval y kico pa evita. Tambe nan ta splica e alumnonan dicon Polis ta haci cierto cosnan, con detencionnan ta bay etc. “Nos ta conta nan hopi casonan cu a pasa den paradanan, pakico ta uza baricada, pues e origen di esaki. E muchanan ta haya esaki hopi leuk anto e reaccionnan ta hopi positivo. Nos ta haci e pret pa nan pero semper cordando nan cu e ta un tema serio si,” sr. Larmonie ta splica. Director di Ceque College Mavo sr. Clay Shipley ta bisa cu e charlanan a bay basta bon pasobra tabata tin hopi interes den e muchanan. “E presentacion tabata tremendo pasobra nan a echt uza cosnan cu ta den e ‘belevingswereld’di e muchanan, asina nan a haya e atencion cu nan tabata kier di nan,” e ta bisa Bon Dia Aruba. Alumno Julia Tromp di klas 2c ta conta Bon Dia Aruba cu el a haya e charlanan interesante. “Esun di Fada cu esun di Polis tabata esunnan cu mi a gusta mas. Di ‘Faya bo haya’ mi a compronde cu e boetnan ta bira hopi mas caro cu e prijs normal.” Otro alumno Usher Herera di klas 2b tambe ta bisa cu el a gusta hopi e charla di polis y ta admiti di a siña mas di ‘Faya bo haya’.
