KPA: Control preventivo den trafico a duna bon resultado

–  E unidad riba brommer di Polis, conoci como e “Motor Unit”, tin como tarea primordial pa tene control preventivo den trafico, specialmente riba careteranan ocupa. Durante temporada di carnaval nan ta masha activo y ta duna masha bon resultado tambe.

Tur esunnan cu a atende eventonan carnavalesco den fin di siman a nota nan presencia, sea moviendo memey di e autonan, of para canto di caminda cu nan luznan cendi pa controla si e fluho di trafico ta bay den forma ordena. Rond mundo, pero aki na Aruba tambe, ta uza Polisnan riba brommer pa ehecuta e trabou di control den trafico pasobra ta maniobra mas lihe entre autonan, compara cu si ta un auto.

Despues di e Parada di Luz na Oranjestad, decenas di e brommernan di Polis tabata move hunto, den un esfuerso pa reconoce autonan coriendo sospechoso of cu no ta comporta den trafico, riba nan ruta bek pa cas. Mester menciona cu a para varios auto y pa sorpresa di e Polisnan, a topa varios hende burachi sinta na banda, cu tabata coriendo cu un chauffeur special pero cu no a bebe alcohol. Precisamente locual a promove tur e tempo.

Asina mes, tabatin 4 chauffeur cu no a logra haya un amigo pa stuur pa nan y como tal a detene nan, duna nan un multa pa stuur auto burachi y a kita rijbewijs di tur. Un di nan tabata riba un brommer, cu a bay “keinta taira” sin mira cu Polis tabata su tras. Ora a bay controla su papelnan y test su persona pa alcohol, el a supla cu un promedio di 575 ug/l di alcohol den su rosea, siendo cu e nivel permiti ta te cu 220 ug/l.

Polis ta contento di un banda cu e trabou duro di conscientisacion ta dunando resultado y cu automobilistanan ta birando mas responsabel, dor di percura semper pa tin un chauffeur asigna pa stuur despues di un evento den cual Bo sa cu lo consumi alcohol. Asina so nos tur hunto por yuda baha e cantidad di accidentenan innecesario cu ta sosode riba nos isla.