Polis y Duana a tene un accion diamars mainta entre 5:00am pa 12:00pm riba tur boto den waf di carga na Barcadera. Na tur tabatin no menos di 30 boto mara den waf y a controla tur esunnan cu a yega mainta, cu tabata 11 boto. Tur e botonan cu a yega Aruba diamars mainta tabata procedente di Venezuela y mayoria tabatin como carga koper, aluminium, hero, etc. Loke e Venezolanonan mes ta yama “chatara”.
Tin di e botonan cu tabatin entre 2.000 kilo pa 40.000 kilo di hero abordo. E “trend” aki ta birando un problema hopi grandi pasobra autoridad no por haci un control manera debe ser riba tur e carganan aki.
Polisnan a comprende di algun capitan di barco cu nan a nenga e botonan aki pa drenta Corsou y Boneiro. Esey ta pone cu awo tur ta bin Aruba cu delaster un hero cu nan por haya of horta na Venezuela y pa bin bende nan aki na Aruba. Ta paga nan $3.70 pa cada kilo. Polis ta adverti cu mester busca un miho forma pa regula e asunto aki pasobra tur dia nan ta bira mas boto y mas carga “chatara” yegando nos isla.
