Director di departamento di Duana, Roderick Croes, a referi di un riba e denuncia di contrabanda di koper haci pa e gobierno di Venezuela. Pero tambe el a papia riba e disgusto cu ta existi cerca cierto importadonan di fruta y berdura cu ta haya cu duana no ta brindando un servicio eficiente y diligente.
Koper di Venezuela
Tocante e contrabanda di koper cu tabata e prome argumento cu e gobierno di Venezuela a uza pa bin cu un blokeo aereo y maritimo contra Aruba, director di departamento di Duana, Roderick Croes, a prefera di no duna mucho comentario.
E ta haya cu e asunto aki ta wordo trata riba un nivel hopi diplomatico. E ta considera si cu Venezuela tin un problema riba cierto cosnan cu ta drenta nos isla cu ta prohibi den e pais bisiña aki, pero cu den nos isla no ta prohibi pa drenta. “E ta drenta legal y normal, y no tin ningun problema cu esaki.”
Importadonan
Encuanto e importadonan di fruta y berdura nan kehonan riba duana tin di haber cu nan kier dispone lihe di nan productonan y abastece nos mercado, mas bien den e temporada di escasez aki, debi na e decision unilateral di Venezuela di bin cu un embargo riba nos isla. Sr. Croes a declara cu nan tin nan reglanan interno con nan ta traha cu ta pone mas prioridad riba containernan friu.
“Nan tin prioridad. Nos ta haciendo e trabou pa asina nos por yuda e comunidad di Aruba tin su productonan mas lihe den nan cas.”
Segun director di Duana e problema cu por a surgi tabata cu recientemente nan tabatin dianan liber y hopi dianan liber naturalmente ta ocasiona tardansa. Pero e ta haya cu di otro banda, departamento di duana ta haci tur nan best pa brinda e servicio manera mester ta.
Pa loke ta e necesidad di personal pa realisa e tarea cu duana ta haci regularmente, director di Duana a bisa cu tin personal pa haci e trabou. Logicamente nan tin cu parti e trabou, ya cu nan control mester ta e miho pa minimalisa e riesgonan specialmente di esunnan cu mester wordo controla.
Informacion lihe y corecto
Pero igualmente e ta haya cu mirando e trabou riguroso cu nan ta realisa esaki ta demanda cu e importadonan mester haci nan proceso manera debe ser. Nan mester percura pa entrega informacion mas lihe cu ta posibel y corecto. Ya cu den caso cu nan ta bin cu informacionnan cu no ta corecto, e ta bay tarda e trabou di duana. Pero tambe e echo aki ta bay tarda otro importadonan cu kisas si a haci nan proceso bon.
Departamento di Duana ta biniendo cu un maneho caminda nan ta pone tur e responsabilidad bek riba e comerciante of importado. Nan tin cu percura pa diligencia tur documento bon hunto cu nan broker. E echo cu nan por diligencia tur documento lihe y corecto ta facilita duana su trabou pa bay mas facil, segun sr. Croes. Si e importado ta cumpli cu tur cos conforme ley e no ta haya cu lo por tin problema di parti di duana.
Igualmente e ta kere cu ta bon pa pueblo sa cu e cuerpo aki mester percura pa duana por realisa un bon control. Tambe nan ta purba di yuda te unda nan por pa e proceso cerca nan por bay mas lihe. Pero di otro banda e parti di responsabilidad ta keda cerca esunnan cu tin cu duna e informacion y esunnan cu ta haci nan trabou, pa asina por facilita e trabou di cuerpo di duana.
