Diabierna anochi partidonan a yega na un acuerdo di principio encuanto e delaster punto pa un termino di 3 aña di CAO entre Kooyman y sindicato FTA.
Un demanda di Kooyman tabata pa no continua cu aumento di salario structural adicional na aumento di salario a base di evaluacion anual. Den e CAO nobo e aumento structural no a wordo inclui. Ademas a traha un acuerdo vinculante riba e aumento di salario structural pa futuro.
A cambio di e consenso di banda di sindicato FTA, Kooyman a bay di acuerdo cu un suma den forma di lumpsum di AWG. 1500,- pa cada trahado. E lumpsum aki ta wordo paga den termino di tres aña.
E CAO nobo ta wordo firma, diamars 21 di juni pa esnan cu ta negocia den termino retroactivo cu ta cuminsa cu fecha, 1 di april 2016.
Diabierna atardi ambos partido no a logra yega na un acuerdo. Riba demanda di mediador ambos partido a sinta atrobe diabierna anochi, cu sinembargo a conduci na un acuerdo mutuo. Esaki ta conduci na un final cu a cuminsa cu un welga diamars 14 di juni atardi 2or di un parti di e trahadonan cu a termina den un welga. Durante welga Kooyman a continua cu servicio pa clientenan.
E personanan cu ta negocia den nomber di Kooyman; Senior Manager Operations Juri Kooyman y Senior Manager Human Resources Sharon York, ta contento cu a yega na un acuerdo. “Banda di trahadonan contento, na final e parti mas importante ta cu Kooyman por keda duna e servicio cu e clientenan ta custumbra cun’e. Esaki tabata e parti cardinal pa yega na un acuerdo, di cual nos a sinti cu mester a entrega mas cu nos ta desea pa logra esaki”. Esaki ta conta tambe pa FTA, cu mester a bandona e posibilidad di aumento di salario structural pa futuro. “Pa splica den otro forma, si ambos partido mester a entrega di nan parti y ta menos contento cu e acuerdo, bo por bisa cu e maximo resultado a wordo logra for di e negociacion”, segun negociado Juri Kooyman.
