Koninkrijksrelaties.nu, un website di e periodista Hulandes René Zwart, cu tabata opera pa algo mas cu un aña, tabata duna noticia di e islanan y di Hulanda relaciona cu loke ta Reino y e relacion entre nan, a termina su operacion di inmediato ayera.
Recientemente a surgi problema cu no tabatin relacion cu e website mes, sino cu René Zwart, doño y operador di e website, y un compañero asesor di organisacion, Harald Linkels, a cera un contract cu e entidad gubernamental di gobierno di Boneiro, ‘Openbaar Lichaam Bonaire’ (OLB), pa yuda den nan seccion di Comunicacion cu publicidad.
E noticia aki tabata e rason pa cual a surgi bastante discusion na Boneiro, y lider di fraccion di Partido Democraat Clark Abraham a haci pregunta den Conseho Insular di Boneiro tocante e contract aki. Riba e website Bonaire.nu, Linkels a duna como comentario riba e turbulencia cu a lanta, cu e ta na prome luga un consehero cu ta na cabes di un organisacion cu 15 profesional cu ta opera den 8 diferente pais y cu nan ta traha tanto pa gobierno como pa sector priva. Segun Linkels e proyecto ta pa mehora, a traves di apoyo na e seccion di Comunicacion di OLB, den preparacion di comunicado di prensa.
Segun Zwart den su comentario final di su website ta bisa:”Ta acusa Bestuurscollege di Bonaire publicamente di ta desea di cumpra mi a traves di cumpra mi servicio pa yuda den preparacion di comunicado di prensa y tabata crea e impresion cu en cambio mi lo a malusa Koninkrijksrelaties.Nu pa faborece mi ‘opdrachtgever’ cu noticia positivo. E acusacion cu lo por cumpra mi – mi no ta comparti e pensamento ey – no ta interesa mi.”
René Zwart ta un conocido periodista Hulandes, cu entre otro durante varios aña tabata involucra cu e revista di gobierno anterior di Aruba, yama ‘Aruba Dushi Tera’ cu tabata sali cada dos luna.
