Ayera tardi fundacion Koningin Wilhelmina Fonds Aruba a tene un conferencia di prensa na unda presidente di e fundacion, Lily Prince a duna un bista ariba con aña 2023 a bay pa e fundacion y anuncia e preparacionnan pa nan campaña di recaudacion di fondo pa e aña aki.
“Nos ta spera cu e aña ki ta hopi miho cu 2023 pa Wilhelmina Fonds na momento cu nos mester recauda fondo den comunidad Arubano,” Prince a expresa.
E presidente di e fundacion a indica cu e gastonan di e fundacion a subi y a bira sumamente halto. El a enfatisa cu e fundacion no ta perde e confiansa den e comunidad aki cu por yuda e fundacion logra haya loke tin mester pa sigui dirigi Wilhelmina Fonds.
“Un palabra grandi di gradicimento ta bay pa e comunidad Arubano cu semper a sa di apoya Wilhelmina Fonds cu su trabaonan, cu ora cu nos sali ariba caya nan ta haci nan donacion,” el a resalta.
Prince a remarca cu tur persona cu traha pa e fundacion ta hendenan cu ta haci e trabao di forma completamente boluntario y no ta ricibi ningun tipo di pago. “Nos ta traha boluntario pa e comunidad Arubano y muy particular pa e pashentnan y familiarnan cu tin di haber cu e malesa cancer,” el a subraya.
El a resalta cu e servicionan y ayudo cu nan ta brinda ta gratuito pa tur persona cu ta inscribi na Wilhelmina Fonds y esaki ta inclui entre otro transport pa nan bay nan tratamento na oncologia of na ImSan pa radiotherapie, pa bay cerca nan specialista ora cu tin cu haya nan chekeo etc.
Prince a splica cu aña pasa tabata un di e añanan cu tabata un tiki mas dificil pa e fundacion. A pesar cu nan a sali varios biaha ariba caya pa colecta y recauda fondo, aña pasa e fundacion a yega un suma recauda di 35 mil florin.
Un suma cu, Prince a remarca, ta yega pa cubri cierto gastonan di net dos luna, particularmente gastonan di e enferemeranan cu ta atende e pashentnan na cas.
“E atencion aki ta gratuito pa pashent, e famia no mester paga nada, pero e fundacion si mester percura pa e tin pa e cubri e gasto sikiera di gasolin di e enfermeranan cu ta brinda e atencion aki na e pashentnan,” el a indica.
Pa e motibo ey aña aki un biaha mas e fundacion ta anuncia for di aworaki na comunidad Arubano cu den luna di april nan ta bay cuminsa cu e campaña di recauda fondo.
