Koningin Wilhelmina Fonds lo organisa pa nan di 9 aña e Ride-Walk -Run-Swim, cu e meta di recauda fondo pa e fundacion por sigui brinda nan servicio na comunidad di Aruba.
Dave Martinus, coordinador di evento, ta bisa cu e aña aki nan a dicidi di agrega e parti di landamento. E ta agrega cu ta importante pa nan meta pa recorda tur hende cu cancer no ta tene na cuenta ken e persona ta y por yega na porta di tur hende.
“Esaki ta un malesa cruel, y ta pa e motibo aki cu nos ta organisa e evento aki tambe. Nos kier recorda riba e sufrimento cu hende ta pasa aden ora cu tin e malesa. E nomber ta Ride-Walk-Run-Swim for the roses”, Martinus a expresa.
El a duna palabra di gradicimento na esunnan cu ta colabora cu nan tur aña y esunnan cu a aporta e aña aki. El a bolbe enfatisa cu meta importante ta pa ‘bin, recorda y duna sosten’ na tur pashent of persona cu tin of tabatin famia cu a sufri of ta sufriendo.
E caminata mes lo tuma luga diadomingo dia 17 di november y nan lo cuminsa cana na e parkinglot di e Alhambra Casino. For di 5or di mainta lo tin un warm-up pa despues 6or di mainta lo cuminsa cu coremento y canamento for di Alhambra Casino te cu Phoenix hotel pa bay bek.
E carera di bicicleta lo sali for di 6:15pm y lo yega te faro y bay bek na e casino. Pa esunnan cu ta core bais, of core of cana y kier tambe participa den e parti landamento, esaki tambe por.
Lo transporta e hendenan cu participa den landamento na ex Bushiri hunto cu e team di Roly Bislik, pa nan sali 8or di anochi direccion Casa Del Mar, pa asina yega bek na Alhambra. E ruta lo ta 1.3km pa adulto, mientras pa mucha tambe lo tin un cu lo sali direccion Tamarijn Hotel y lo consisti di un distancia di 600 meter.
Ta recorda pa tur hende cu ta cana, core bais of core, cu tambe tin esunnan di Fun Walk cu por participa y duna sosten tambe; mescos pa e landamento. “Na final nos lo tin un medaya pa cada participante como reconocimento. Tambe lo tin entretenimento y premio.”
Pa registra e aña aki mester bay riba www.itsyourrace.com anto por pasa busca e pakete y number di BIP na oficina di Wilhelmina Kanker Funds of na Radio Shack. Tambe por pasa busca riba e mesun dia.
Ta recorda cu fundacion ta recauda e fondo pa sigui distribui diferente material di conscientisacion tocante diferente tipo di cancer. Nan ta participa y organisa varios charla y brinda sosten directamente na e pashent cu cancer.
Annie Dirks, Marketing Manager di Alhambra Casino a bisa cu nan kier yuda cu e sufrimento di cada pashent pa asina uni pa yuda cu e causa y pone un sonrisa na e persona cu ta pasando door di un tristeza. Di parti casino lo brinda sopi pa esunnan presente, koffie, te entre otro.
Glennon Eights di Aruba Triathlon hunto cu team lo coopera den registracion y tempo pa participantenan. Pa pasa inscribi den e area cu ta desea di participa, paga y busca pakete pa aporta na e causa.
