Ayera atardi, Lilly Prince, director di Koningin Wilhelmina Fonds Aruba (KWF), a duna un conferencia di prensa pa informa comunidad cu den luna di april ta bay cuminsa nan colecta anual cu ta bay tin un duracion di dos luna, pa asina ey por haya mas fondo pa e fundacion por sigui yuda comunidad.

Primeramente, Prince a conta cu e gastonan pa e fundacion na aña 2022 tabata 141.588,80 florin den total, cual a parti den cuido na cas pa pashent terminal (90.684,77 florin), a paga na e verpleegsters cu a asisti pashentnan na cas transporte pa e pashentnan por bay na radio terapia, kimoterapia, entre otro (41.634 florin), y e damanan cu tin cu haya nan protesis y nan brazier (9.770,03 florin).

Prince a bisa cu nan tin 135 pashent cu ta sufri di cancer di prostaat (20), cancer di colon (17), cancer di pecho (16), cancer di pulmon (17) y cancer di pancreas (18), entre otro tipo di cancer cu tin dos of tres caso.

Tambe el a haci un peticion particular na e damanan cu ta inscribi den e fundacion pa nan haya nan protesis. El a trece dilanti cu nan tin entre 35 pa 50 dama cu ta wordo yama casi tur siman; fundacion ta yama nan pa busca nan protesis, pero na e momentonan aki nan no ta hayando contacto cu e pashentnan aki pa diferente motibo.

“Nos kier haci un peticion, cu si bo ta bin na remarca, cuminsa yama na Wilhelmina Fonds den oranan di mainta pa nos asisti bo cu esaki”, Prince a sigura.

Tambe el a duna di conoce nan campaña di colecta di fondo cu ta bay cuminsa diasabra awor dia 1 di april y ta bay prolonga te luna di mei. Tur diasabra di e dos luna aki (menos 8 di april cu ta Semana Santa y diasabra prome cu dia di mama cu ta 13 di mei) e boluntarionan di Wilhelmina Fonds ta bay ta para na diferente puntonan como brug di Renaissance, Caya Betico Croes, Imelda Kleuterschool, rotonde di Santa Cruz, Rotonde di Noord, rotonde di Tanki Flip y algun hobennan ta bay ta dilanti Botica Benu na San Nicolas.

Prince a bisa cu tur e gastonan cu a wordo menciona caba ta bay directamente pa comunidad, pa loke nan ta espera cu pa e dianan aki nan por haya mas fondonan “pasobra bo no sa nunca pa ken e donacion aki ta bay, Prince a finalisa.