Durante e debate den Tweede Kamer diaranson pasa, encuanto e ley di Reino proponi pa Knops pa yega na un areglo di disputa, e secretario di estado no por a mantene e actual conflicto cu gobierno di Aruba pafo di e debate. Prome, Knops a purba frena su mes bisando cu ta trata di un asunto coriente y cu e no por bisa mucho, pero seguidamente el a uza e ehemplo di e caso aki, cu durante Conseho di Ministro di Reino di awe lo ser trata pa loke ta e eventual pasonan cu lo tuma como contesta riba e cambionan haci pa parlamento di Aruba den e ley di supervision financiero.

Knops, splicando na parlamento Hulandes pakico e no ta haya bon pa pone den e ley di areglo di disputa cu tur veredicto di e corte cu ta trata e disputanan ta imperativo, a bisa: “Laga mi ta un poco mas concreto cu un ehemplo reciente. Na Aruba na e momento aki a surgi un ‘impasse’ alrededor di e adaptacion di e LAft, e ley Arubano cu ta regla e supervision financiero. Staten di Aruba den su mayoria kier a adapta e LAft di tal manera cu Gobierno di Reino no tin posibilidad mas pa eherce supervision. Esaki ta en pugna cu e acuerdonan haci pa gobierno di Aruba y Hulanda. Nos ta papiando di un asunto andando. Riba su mes, mi no por sigui argumenta tocante kico tur esaki lo por bay significa, pero e ta parce mi un circunstancia abnormal. Mi no lo ta conta nada sorprendente si mi bisa cu e posibilidadnan pa interveni riba e punto aki ta ser analisa pa mi departamento, si acaso Aruba continua riba e caminda cu a scoge aki. Trata di imagina cu un intervencion asina ta tuma luga y cu tin un areglo di disputa vigente sin ‘safety valve’. Den e caso ey, cualkier imperfecto huridico o paso procesual, pa chikito cu e ta, por ser gara pa frustra e intervencion. Si esey lo conduci na un veredicto imperativo incondicional, probablemente lo mester start un otro trayecto di toma di decision pa logra mesun cos, pero sin e imperfecto chikito huridico aki, pa chikito cu e ta. Un decision nobo ta implica atrobe un ronda nobo di procesa y termina un disputa. Cu otro palabra, lunanan ta pasa, inkietud riba mercadonan financiero, e solvencia financiero ta empeora, e condicionnan bao di cual Aruba lo por financia su debe ta bira cada bes mas desfaborabel, interes riba interes cu ta keda subi.”

“Un consideracion politico-administrativo den e tipo di caso tambe por ta – un biaha mas, mi no ta anticipa den e asunto aki – cu nos no ta laga comunidad Arubano pa su cuenta y cu mester actua rapido y decidido, si ta necesario poniendo un banda e veredicto di Raad van State di Reino. Esaki no na ultimo luga, pasobra tin un posibilidad real cu tardi o tempran na algun luga den Reino ta ‘aterisa’ un factura. Mi tin un sospecho unda esey ta bay ta. Ta p’esey mi ta pro un areglo di disputa den cual bao di circunstancia normal ta sigui e veredicto di Raad van State, pero mi no por cera wowo pa e tipo di circunstancia abnormal aki cu mi a caba di describi, cu mester tuma na cuenta den e areglo.”

Despues Knops a referi na otro caso unda segun su opinion actua rapido y contudente ta necesario, y esey tabata e caso di Sint Maarten den e prome dianan despues di e horcan na 2017. “Tabatin menasa di un situacion caotico cu por a surgi unda orden publico lo a ser poni na prueba seriamente. Gobierno di Sint Maarten den e dianan ey casi no tabata comunica y ta danki na e empeño di forsa militar y e ciudadania di Sint Maarten cu e situacion no a bay for di man. Den e situacion ey tabata imaginabel cu – mi no ta bira rond di e asunto – gobierno di Reino lo por a interveni na Sint Maarten. Imagina cu e intervencion ey lo a ser apela den Conseho di Ministro di Reino, anto e areglo di disputa tabata na vigor caba. (…) Lo tabata aceptabel bao di e circunstancianan ey si un veredicto di e seccion di Raad van State lo a impedi un intervencion pa salba Sint Maarten di un collapse completo?”

Cu e referencia aki na e conflicto cu a surgi entre gobierno Hulandes y gobierno di Aruba, y e posibel intervencion di gobierno di Reino, ta anticipa cu por tin un decision awe caba. Conseho di Ministro di Reino ta reuni, manera di custumber riba tur prome diabierna di luna, y e LAft cambia segun deseo di mayoria di Staten di Aruba luna pasa, ta riba agenda. Minister encarga cu Finanzas tambe lo ta presente den e reunion.