Ministro Hulandes di Asunto di Interior y di Reino, Raymond Knops, tabata na Aruba ayera pa discuti varios asunto andando cu gobierno di Aruba.
Primeramente el a haci un bishita cerca Gobernador, unda a discuti extensamente loke ta finanzas, Venezuela y colaboracion den Reino, cu tabata un bon conversacion. Despues tabatin un entrevista cu Minister Presidente, Evelyn Wever-Croes tocante e mesun temanan. Tambe el a haci un bishita na Fundacion pa Hende Muhe den Dificultad y na algun monumento, manera e forno di kalki na Playa. Tambe Knops a haci un bishita na Imsan, pa mira e facilidadnan medico cu ta cla pa cuminsa. Despues di un bishita awe na Bonaire, Knops lo ta presente tambe na e consulta entre e ministronan di husticia di e paisnan den Reino.
Cu Prome Minister, Knops a analisa e situacion financiero di gobierno, cu ta presenta algun reto grandi segun Knops pero el a mustra un optimismo cauteloso pa cu esaki, teniendo confiansa cu gobierno di Aruba lo sali di e retonan. Ultimo biaha cu nan a papia tabata na november pasa y e ta haya cu e colaboracion ta bayendo bon. Aruba tin problema fuerte ainda pa resolve, principalmente riba tereno financiero, nan (Hulanda) ta realisa esey tambe pero e ta kere cu ta bay logra. “Ta un caminda so tin y esey ta bay padilanti,” Knops a remarca. “Loke ta importante ta pa tuma medidanan necesario pa Aruba por tin un economia floreciente, cu ta brinda empleo y tambe mas entrada pa gobierno pa por atende su asuntonan.
Knops a expresa cu di ambos banda ta sinti cierto satisfaccion pa e colaboracion actual den Reino, loke tambe segun Knops a keda expresa di banda di Prome Minister. Su impresion tabata cu Aruba su economia ta riba bon caminda, cu bon desaroyo di turismo, loke di otro banda ta keda un reto pa motibo cu ta trata di un solo sector cu ta carga economia, loke semper tin su riesgonan conoci.
Riba pregunta di prensa con Knops ta mira e ambicion di gobierno di Aruba pa yega na un prestamo faborable via Hulanda (“zachte lening”) mirando cu gobierno ta haya cu cos ta bayendo den bon direccion, cu e surplus proyecta pa 2020, Knops a mustra un poco cuidadoso, bisando cu no ta trata solamente di un aña di surplus pero tambe con bo ta yega na esaki. Si ta un aña logra cu entrada incidental esey no ta suficiente. Igualmente trata e asunto di e Begrotingskamer cu ta depende di e pregunta si Aruba ta atende su finanzas structuralmente manera mester ta, anto e ora esaki lo bin riba mesa. E carta cu gobierno a manda aña pasa cu e ruta cu nan ta propone pa yega na institucion di e Kamer y e desaparicion di CAft, Knops no ta haya suficiente como base pa e Begrotingskamer.
Tambe tabatin pregunta tocante e aanwijzing di aña pasa, unda Knops a contesta cu esey tambe ta depende di presupuesto 2020. Knops ta bisa di ta satisfecho cu e forma con ta colabora pero e no ta contento ainda cu e resultado. Evaluacion di presupuesto 2020 lo duna un decision final den esaki. “Cubri gasto structural cu entrada incidental no ta administracion financiero adecua; y CAft lo keda vigila esey,” Knops a observa.
Bon Dia Aruba a haci Knops e pregunta si no ta preocupante cu aña pasa ya caba e aumento di belasting pa cumpli cu presupuesto a duna un golpi na e consumo local cu finalmente e crecemento real a casi desaparece bao di efecto di e aumento (inflacion). Pa 2020 tin un medida na caminda cu ni sikiera ta conoci y cu por conduci na un repiticion di e fenomeno di 2019, cu e medida di gobierno ta afecta consumo di tal forma . Knops a mustra optimismo pa loke ta desaroyo economico di Aruba y ta kere cu lo tin e espacio pa gobierno haci loke mester haci, mirando cu e debe publico ta keda un peligro grandi y por lo tanto mester baha. “Naturalmente mester haci esaki cu cautela pa bo no kibra bo economia cu austerisacion, pero bo lo mester “de tering naar de nering zetten” (gasta segun cu bo tin), principalmente pa loke ta e gastonan di personal. Pero pa esaki e ta referi na e acuerdonan cu tin den e Protocol di 2018, cu cual gobierno lo mester cumpli. Tabatin un problema chikito aña pasa, segun Knops, pero cu esaki a keda regla pa loke ta presupuesto 2020. Knops tabata referi na e discusion tocante e gastonan di personal di e Crisisplan Social cu pa 2020 si a keda incorpora den presupuesto, cumpliendo cu e norma di Afl. 479 miyon.
Tabatin pregunta di prensa tambe encuanto e incidente cu Aruba Airlines cu a termina riba mesa di Reino. Sin embargo, Knops a observa cu esey ta coresponde na su colega di Asunto Exterior, Stef Blok y a desisti di comenta.
