Cooperacion entre Hulanda y Aruba riba sosten di likides y otro asuntonan pa e isla no ta bay cambia awo cu gobierno a entrega retiro. Esaki ta loke secretario saliente pa Relacionnan di Reino, Raymond Knops, a bisa siman pasa.
Segun un relato den e medio online CuracaoChronicle a reporta, Knops a bisa cu negociacionnan tocante paketenan di ayudo ta continua cu e gabinete saliente na Aruba, pasobra ainda e gabinete saliente por maneha asuntonan actual. Tambe el a bisa cu ainda tin sosten politico amplio pa e paketenan economico y e reformanan cu ta compaña esakinan. Segun Knops, acuerdonan nobo pa e motibo aki no ta den peliger.
Manera Bon Dia Aruba a reporta, diamars ultimo gabinete di Evelyn Wever-Croes a entrega nan renuncia, relaciona cu un accion di Ministerio Publico (OM) cu a pone beslag riba un cuenta di partido di coalicion, POR, pa sospecha di malversacion. Segun Wever-Croes, integridad ta un di e puntonan mas importante di su gobierno, loke a duna impulso na nan retiro.
Siman pasa tambe a keda anuncia cu Aruba lo ricibi atrobe mas di 100 miyon euro den sosten di corona. St. Maarten no ta ricibiendo sosten pa awo, pasobra ta acusando Hulanda di racismo den un demanda entrega cerca Nacionnan Uni. E establecimento di un organisacion special cu ta supervisa e reformanan, segun e isla, ta colonial.
