(NLTimes)—KLM a gaña clientenan cu varios aviso tocante su esfuersonan di sostenibilidad, segun corte na Amsterdam a dicidi diaranson. E organisacion ambiental Fossielvrij a acusa KLM di “greenwashing” por medio di pone cliente kere cu pa bula cu e aerolinea Hulandes tabata sostenible, mientras cu su medidanan tabatin un efecto limite.
E corte a duna huicio den fabor di Fossielvrij. Segun e corte, algun di e avisonan di KLM a haci “declaracionnan vago y general tocante beneficionan ambiental,” y asina a gaña clientenan. Den otro aviso, KLM “ta pinta un pintura positivo” di e efectonan di medida manera usando combustible traha di material renobabel y reforestacion. “E medidanan aki ta reduci e aspectonan negativo di medio ambiente un tiki so y ta duna un mal impresion cu pa bula cu KLM ta sostenible,” e corte a bisa. “P’esey KLM no ta provee clientenan cu informacion honesto y concreto.”
E aerolinea Hulandes a stop di presenta e avisonan y no mester rectifica nan, corte a bisa. “Si KLM informa clientenan tocante su ambicion den e area di reduci CO2, por ehempel, e mester haci esaki honestamente y concretamente.”
E corte a dicidi contra e peticion di Fossielvrij pa prohibi KLM di pone aviso pa bulamento mes. E aerolinea tampoco mester adverti clientenan cu bulamento no ta sostenible.
