Ayera comerciantenan cu tienda den Caya Betico Croes a protesta contra e klem anto exigi pa habri e Caya bek pa trafico. Nan a bay parlamento anto temporalmente interumpi e reunion publico riba caso di minister Paul Croes pa vocifera nan preocupacion. Resultado ta cu gobierno awor a elimina e klem di parkeer den Caya.

Prome minister Mike Eman a subi e tribuna pa asina bay purba di calma e publico cu tabata keda interumpi e reunion. Akinan minister Eman a tuma un rato pa scucha e diferente preocupacionnan cu e comerciantenan a trece pa dilanti. Tin mas cu 50 tienda cu a cera nan porta den Caya Betico Croes anto basta empleado cu mester a cambia di empleo, te hasta keda sin trabao segun e comerciantenan tabata grita den parlamento. Nan ta cansa cu e desaroyo di Caya Betico Croes y ta exigi gobierno pa haci algo inmediatamente.

Elimina klem
Un comerciante ta bisa prome minister cu: “E bishita di un turista pa Aruba ta uno placentero. E klem ta haci e turista su bishita implacentero, nos kier un cambio pa esey.” Mandatario Eman a contesta mesora cu e ta di acuerdo y subraya cu: “E klem ey no ta sirbi. Nos a pidi departamento legal pa traha riba un evaluacion pa por percura pa elimina e klem.”

Sin embargo e comerciantenan a sigui grita cu nan no ta warda riba mas evaluacion. “E klem mester bay y Caya mester habri bek.”  Prome minister a laga sa cu Caya Betico Croes tabata den un situacion hopi malo anto e renobacion di e infrastructura tabata e prome fase pa asina continua na mehora e Caya. E minister a enfatisa cu e trabao no a caba. Despues cu e grupo di manifestante a sigui grita pa kita e klem mesora, prome minister a bisa: “Ok, nos ta kit’e awe.”

Descontento paden y pafo di Caya Betico
Bon Dia Aruba ya a publica structuralmente riba e desaroyo den Caya Betico Croes unda comerciantenan ta kehando riba e falta di publico. Gobierno a tuma varios decision, entre otro habri e Caya bek pa trafico durante cierto orarionan. Sinembargo esaki te ainda no ta dunando e resultado principal pa comerciantenan lo keda, esta hisa nan benta. Un otro factor cu ta hungando un rol ta e mallnan cu nan a keda lanta na Aruba. Esaki ta crea hopi competencia cual por mira mas y mas e efectonan negativo pa e centro di Oranjestad.

Poder di compra a baha
Aña pasa Bon Dia Aruba a haci un encuesta den tiendanan paden y pafo di Caya Betico Croes anto combersa cu varios comerciante riba entre otro poder di compra y nan pensamento riba algun otro preocupacionnan. Nos a bishita algun negoshi local pafo di Caya Betico Croes cu ta remarca cu nan tambe ta sinti efecto di e economia y varios di nan lo por ta kisas cera mes si nan no lo tabata tin clientenan regular. Asina pa indica cu economia ta hungando un rol y pregunta ta keda awor si e kitamento di e klem di auto, lo trece e benta bek den Caya Betico Croes realmente.

Aruba tin varios negoshi rond di e isla cu ta ofreciendo nan servicio pa basta aña te hasta decadanan, sinembargo, pa hopi di e comerciantenan aki cosnan no ta mescos cu antes. Tuma por ehempel manera nos a yega di publica caba, Shatri Jewelry & Accessories na Belgiestraat cu segun gerencia, e negoshi ta existi pa 30 aña caba y ta sufriendo hopi e ultimo 3 pa 5 aña.

Den e edificio actual caminda cu nan ta situa na Belgiestraat nan tin mas o menos 20 aña caminda nan a cuminsa como un joyeria. Despues cu joyas a cuminsa cay den e mercado, Shatri a bira un boutique.

Gerencia di Shatri ta relata: “E boutique tabata bay hopi bon pasobra nos tabata pafo di Caya, nos tabata haya hopi local cu tabata bin cerca nos. Pero den e ultimo cinco aña nos bentanan a baha hopi.”

Aña pasa nos a bishita Giselle Department Store na Noord tambe y combersa cu e doño Greta Posner – Figaroa. El a splica nos cu:  “Nos ta sinti efecto di e koopkracht masha hopi mes cual pa nos a cuminsa for di aña pasa (2015) poco pisa pero e aña aki hopi mas. Mi no sa si ta hende tin menos placa pa gasta, ta gasta placa na otro cos cu no tin mester manera bay sali pero nos clientela a keda mescos.”  Na Giselle Department Store, un negoshi cu a caba di haci 35 aña di existencia den augustus aña pasa,  antes cliente tabata cumpra 300 florin di articulo cu awor a baha pa 200 of 150 segun nan a informa nos.

Paña a bira un luho
Algo cu dia pa dia ta birando pio segun varios otro comerciante tambe por a comparti cu Bon Dia Aruba, ta e hecho cu nan ta sinti efecto di poder di benta cu a bay hopi atras.  Bida a bira cu e cosnan principal ta bin prome manera awa, coriente y despues ta bin luga pa un luho. Antes por ehempel joyeria tabata un luho pero segun comerciantenan ta remarca, awo hasta un paña, tas y sapato a bira un luho y nan ta keda na e ultimo luga.

“No tin poder di benta. Antes clientenan tabata drenta y cumpra tres pa cinco articulo pareu. Aworaki nan ta bin anto nan mester check nan budget, check esaki anto check esey pa nan bay cumpra porta 1 paña. Nan ta pasa wak prijs anto el a djis bira hopi dificil,” gerencia di Shatri ta comenta. Tin varios boutique chikito cu ta habri mas tanto den temporadanan di fin di aña pa un periodo di dos of tres luna anto esey segun gerencia di Shatri ta caba cu bo mercado. Por ehempel hopi hende cu ta bin di afo, bende nan mesun cas of pone riba credito y esaki ta causa cu negoshinan manera Shatri ta perde clientenan cu tabata ‘walk in’.

Bon Dia Aruba a bishita algun comerciantenan na Ponton cu tambe ta sinti cu poder di benta ta hungando un rol grandi. Un comerciante na Ponton Shopping Center ta comenta cu: “E economia di e isla mes ta hungando un rol pues algo mester wordo haci cu esey. Mi tin clientenan regular y nan ta hopi honesto tambe pues nan ta bisa mi cu nan no tin placa awo pues nos ta discuti riba e cosnan aki cu e clientenan. Bo ta ripara den comparacion cu dos aña pasa, e benta ta otro, el a baha.”