Mediante un comunicado pa prensa, Kiwanis Club of Palm Beach a informa cu nan ta aportando na comunidad di Aruba en general y ta lamenta insinuacionnan haci cu ta afirma cu nan no ta aporta na Carnaval.

“Kiwanis Club of Palm Beach (KCPB) a tuma nota di algun publicacion insinuando cu KCPB lo no ta aportando na Carnaval y cu KCPB lo ta actuando contra ley pa cu e fiesta anual di Masquerade. KCPB ta lamenta e insinuacionnan aki.”

Den e comunicado ta indica cu “pa 40 aña KCPB ta contribuyendo na nos comunidad, cu un cantidad grandi di proyectonan na beneficio di desaroyo di muchanan ariba nos isla. Tambe KCPB a bin ta haci donacionnan cuantioso pa un cantidad grandi di organisacionnan cu ta aporta na educacion, deporte, y na garantisa cu muchanan no mester pasa hamber na Aruba. KCPB ta organisa diferente actividadnan pa genera fondo pa por cumpli cu e metanan menciona. E tent di KCPB na paradanan di Carnaval y e fiesta di Masquerade ta dos di e actividadnan pa genera e fondo necesario. E dos actividadnan aki ta posibel cu aporte di diferente comerciantenan cu ta permiti KCPB usa nan tereno/edificio priva y/o ta haci donacion pa por logra esaki.”

KCPB a splica cu nan ta consisti di un grupo dedica di boluntario cu ta aporta di nan mes cartera, tur luna financieramente y ta duna tur dia di aña di nan tempo liber pa logra e metanan ariba menciona. KCPB su enfoke ta pa aporta na comunidad general y lo sigui haci esaki cu hopi amor.

Manera custumber, despues di actividadnan di KCPB, tur fondo crea lo ser reparti na organisacionnan cu ta aporta na interes general, asina KCPB lo sigui pone su energia y dedicacion na cosnan positivo pa comunidad di Aruba. KCPB ta gradici cada un persona, organisacion, comerciante cu ta yuda KCPB pa logra e meta di yuda comunidad di Aruba.

Esaki a bin dilanti pa afirmacionnan haci di parti di presidente di SMAC, Darren van Ommeren, ken den un post di KCPB a splica cu: “Mi ta contento y sigur nos ta pidi pa tin mas hende manera boso den nos comunidad. Pero como presidente di SMAC, nos mester percura pa tin un planning den e periodo cu nos tin un Algemene Vergunning. Esaki ta pa nos protege tur actividad y no sobrecarga e dianan cu evento. Pa es motibo cada organisacion, incluyendo gruponan, mester haci un peticion na SMAC pa SMAC por duna un fecha pa no afecta ningun evento, tanto di SMAC, grupo of di cualkier organisacion. Diabierna 9 di Februari, un organisacion a haci nan peticion manera mester ta y awor nos ta wak riba FB cu tin un actividad di Kiwanis riba mesun fecha, ESAKI NO POR. Dicon e beleid no ta conta pa Kiwanis? Dicon Kiwanis por bay polis sin pasa SMAC ? P’esey mi punto ta, beleid of ley mester conta pa nos tur, no pa un grupo so. Mi ta keda pendiente si boso lo cana e caminda manera tur hende of boso ta haci manera boso ta haya ta bon?” Van Ommeren a skirbi.