Diasabra ultimo, Kiwanis Club of Palm Beach conhuntamente cu Wit Gele Kruis a haci entrega di 17 child car seat den conexion cu un proyecto cu ya caba a cumpli 25 aña y cu ta percura pa seguridad di e muchanan den comunidad.

Onasito Thiel ken ta fungi como presidente di Kiwanis Club of Palm Beach a sigura cu casi tur aña nan ta bin entregando child seat na diferente famianan na Aruba, unda nan a entrega mas cu 200 den e ultimo 25 aña.

Esey tabata e caso diasabra ultimo caminda diferente famia selecciona pa Wit Gele Kruis a bin hunto pa haya un child seat.

“E ley na Aruba ta bisa cu ora bo tin un mucha te cu 12 aña e mester ta den un child seat p’esey Kiwanis semper ta pensa den seguridad den trafico y pa tene e muchanan sigur cu nos ta contribui cu e proyecto aki di child seat,” Thiel a expresa.

Di su parti, Monique Giel di Wit Gele Kruis a sigura cu efectivamente nan tin mas cu 25 aña ta traha hunto pa entregamento di child car seat mirando cu nan ta den area preventivo y un di e parti cu nan ta haci hopi enfasis durante nan consultanan y tambe durante nan bishita na casnan nan ta pone enfasis riba seguridad, un di nan ta seguridad den trafico.

“Mirando cu nos tin hopi famianan cu debi na e situacion cu tin aworaki ta hopi duro, nos ta yuda nan pa yega na un chil seat vooral pa e seguridad di e yiu, p’esey tambe awe tardi hunto cu Kiwanis y nos ta gradici Kiwanis pa esaki, cu pa 25 aña ta entrega chil seat na famianan, nos ta gradici nan inmesamente pa e apoyo y sosten na e famianan,” Giel a declara.

Asina mes, el a bisa cu seguridad den trafico te ainda por mira cu mayornan ta stuur cu yiunan den brasa of por wak ainda cu muchanan ta sinta memey di e mayornan sin un chil seat “sin tene cuenta riba e consecuencianan cu esaki por trece cune na momento cu e auto break of un auto ta dal patras cu e mucha ta bay den e windshield.”

Gile a sigura cu nan a haya casonan asina caba y pa e motibo ey nan ta pone extra atencion riba esaki door di duna informacion durante consulta of durante nan bishitanan na cas haciendo enfasis riba e seguridad den trafico.

Por medio di consultatiebureau nan ta haya informacion di famianan rond Aruba cu na momento cu e mama haya yiu e ta bin na e consultatiebureau y eynan nan ta duna informacion y guia pa cuatro aña continuo “no ta solamente pa yiu haya e hangua sino tambe pa haya informacion cu nos ta haci esaki riba tereno preventivo pa preveni un consecuencia cu esaki por trece cune si no ta bay manera cu e mester ta,” el a bisa.

Nan ta keda papia cu mayornan y duna informacion pa nan bira consciente na momento cu nan mira cu algo ta tuma luga, por ehemplo, nan ta yega na consultatiebureau y yiu ta den auto sin un child car seat, semper nan ta busca e motibo di pakico no tin un child car seat y asina tambe e enfermeronan di consultatiebureau sa con e famia nan situacion ta y nan ta traha lista y manda esey na Giel.

Giel ta manda e informacion aki na Kiwanis Club of Palm Beach pa cuminsa organisa un atardi pa haci entrega di e chil car seat.

Pa finalisa, Onasito Thiel di Kiwanis Club of Palm Beach a enfatisa e importancia di e fundraising cu nan ta haci pa asina comunidad di Aruba por contribui cu nan “pa motibo cu door cu e placa cu nos ta genera den nos fundraising e proyectonan aki por realisa, nos tin hopi proyecto durante e aña, manera esaki di child seat, esun di Back to School y Ride for Kids, ta comunidad di Aruba ta yuda nos pa nos por haci e proyectonan aki posibel y duna e placa back na comunidad,” el a sigura.

Kiwanis Club of Palm Beach ta un organisacion dedica na sirbi e muchanan di mundo y mehora calidad di bida. Kiwanis Club of Palm Beach ta realisa hopi proyecto di servicio comunitario na Aruba pa yuda sirbi muchanan y otronan den necesidad.

Sea ta pasando e weekend limpiando un scol, drechando un cancha di basketball, poniendo un area di fitness nobo, tereno di wega of pintando Neptali Henriquez Park, nan miembronan di club ta enfoca riba duna back na e “One Happy Island” Nan ta dedica tambe incontabel oranan buscando maneranan nobo pa recauda fondo, conscientisa, of lanta speransa den tur loke nan ta sirbi.