Durante un conferencia di prensa ayera tardi na nan sede na Nepthaly Henriquez Park, Kiwanis Club of Palm Beach Aruba a duna informacion tocante e gran fiesta Carnaval Masquerade Party, cu despues di dos aña t’ey back.
“Nos di Kiwanis Club of Palm Beach Aruba ta preparando un biaha mas pa genera fondo pa brinda sosten na nos muchanan cu mester di e sosten aki na Aruba pasobra comunidad ta cambia cu cada mucha contento,” e presidente di Kiwanis Club of Palm Beach Aruba, Daniel Aguire, a expresa.
Aguire a splica cu Kiwanis Club of Palm Beach ta enfoca den e stimulacion di e desaroyo di e muchanan di Aruba cu programanan manera entre otro Terrific Kids, Builders Club, cu ta activo na varios scol na Aruba, Circle K, cu ta activo na Universidad di Aruba, e programa Stima Mi Guia Mi y Back to School project.
Ademas di e proyectonan cu nan tin, Kiwanis Club of Palm Beach a haci donacion di entre otro water coolers, child car seat cu ta bay man den man cu un campaña di conscientisacion tocante esaki, nan ta haci donacion tambe na Cede Aruba, Hunga Teca, YMCA, Casa Cuna, Buki di Pret, Jump 18 program y otronan.
“Tur ta na bienestar di nos muchanan. Asina tin hopi mas proyecto cu nos ta ehecutando pa yuda nos mucha- y hobennan haya e oportunidad pa sigui crece. E lema di Kiwanis International ta ‘Serving the Children of the World’, y e lema di Kiwanis Club of Palm Beach Aruba ta ‘Changing the Community One Child at the Time’,” Aguire a remarca.
El a subraya cu Kiwanis Club of Palm Beach ta kere cu inversion den muchanan lo yuda nan, nan mayornan y e scolnan tambe, enfatisando cu mester enfoca ariba esaki.
Aguire a agrega cu e fundraising, Carnaval Masquerade Party, ta genera parti di e fondonan cu e club ta usa pa nan por sigui ehecuta e trabounan cu nan ta haci. “Di e forma aki henter comunidad di Aruba ta contribui cu e proyecto dirigi na bienestar di nos muchanan.”
Cheito Croes, coordinador di e Carnaval Masquerade Party a indica cu despues di dos aña e fiesta ta wordo organisa un biaha mas. Naturalmente, manera hopi na Aruba, e club tambe a wordo afecta door di COVID-19 na aña 2020 y aunke nan cu a purba di organisa e fiesta aña pasa, nan no logra. “Aworaki mi ta kere nos ta cla pa organisa e di 24 edicion di Carnaval Masquerade Party,” el a señala.
“E Carnaval Masquerade Party lo tuma luga dia 17 di februari 2023 na unda e fiesta mas grandi cu tur hende ta custuma cune, cu tur hende sa di dje y cu ta sperando e, lo por bay gosa di dje un biaha mas,” el a agrega.
Croes a indica cu despues di e break di dos aña nan ta cla pa brinda un tremendo fiesta pa recauda fondo na e comunidad di Aruba. Pero e parti mas importante, el a enfatisa, ta cu e ta bay un fiesta di mascarada na unda tur hende cu asisti na e fiesta por disfrasa.
Manera cu ta custumber caba e ticketnan ta pa pareha, dos persona, y esaki lo tin un costo di 500 florin cu ta inclui premium snacks y open bar. Lo tin tambe, manera semper, door prizes y lo tin tambe diferente premio, alrededor di 60 premio, pa e diferente tipo di costume.
“Nos ta echt sperando esey un biaha mas, tur e creatividad, tur e ideanan, tur e plannan di e diferente costumenan cu bo a pensa riba dje e ultimo dos añanan, aworaki nos ta cla pa wak nan y pa boso show e off,” Croes a indica.
E Carnaval Masquerade Party ta conoci pa tin un ambiente increibel, naturalmente den e atmosfera di carnaval. Pa esaki ta bay tin cuater diferente banda. Ticketnan ta limita na 650 ticket pa e anochi aki y e fiesta lo tuma den Renaissance Convention Center for di 9:30 di anochi pa 2:30 di marduga
E bandanan cu ta encarga cu e ambiente pa e anochi aki ta Tsunami, Nfuzion, Musical Time y Robert Jeandor y su Solo Banda.
Croes a splica cu pa loke ta trata e ticketnan e aña tin un cambio. E ticketnan cu antes tabata riba papel, aworaki ta bira digital. Pa cumpra ticket mester tuma contacto cu un di e miembronan di Kiwanis Club of Palm Beach Aruba of a traves di nan pagina di Facebook of Instagram. E persona cu kier cumpra su ticket lo ricibi un link pa e registra pa haci compra di e ticket digital y asina cu e pago wordo procesa e QR code ta wordo genera y naturalmente cu e QR code e persona por drenta e fiesta.
“Nos ta back, nos ta bay bin mas grandi cu nunca. Nos tin diferente sorpresa pa e anochi aki y ambiente ta bay unico,” Croes a enfatisa.
Kiwanis Club of Palm Beach tabata duna alrededor di 180 mil florin den diferente proyecto y donacion cada aña. Pa motibo di Covid e suma ey naturalmente a baha na entre 70 y 80 mil florin y aworaki cu aporte di comunidad cu e compra di un ticket pa e Carnaval Masquerade Party e club por contribui back na tur e diferente proyecto cu nan ta apoya.
