Minister encarga cu Asuntonan Social y Labor Glenbert Croes (MEP) a recientemente revoca e maneho di gobierno anterior relaciona cu instruccionnan di 11/27 juli 2014 di ‘1,2,3 strike you’re out’ pa hendenan cu ta cobra bijstand. Esaki tabata si no meld pa di tres biaha na DPL (Departamento pa Progreso Laboral) bo bijstand ta wordo kita. Gobierno lo bay haci un evaluacion social/humanitario awor pa wak con kitando bijstand di hende ta afecta otro miembronan di famia.

For di temporada di gobierno anterior, den 16 augustus 2017 pa ta specifico, Departamento di Asuntonan Social a trece dilanti cu mester revisa e maneho aki. Pasobra pone cu bo tin hobennan cu no ta meld na DPL pa ki motibo cu ta. Si dado momento bo kita bijstand for di nan pa presion pa haya trabao sin guia pa haya trabao, mester corda cu e hoben ey kisas ta manteniendo un famia segun minister Croes ta splica. “Ora bo kita e bijstand for di dje bo no ta perhudica e hoben ey so, por ta e tin un yiu y señora cu ta depende di e bijstand. E recomendacion di departamento di Asuntonan Social ta cu bo mester haci un evaluacion humano, social di e situacion di e famia prome cu bo tuma un decision final.”

Gobierno anterior su maneho tabata ta cu bo ta haya bijstand pero mester registra pa purba haya trabao of upgrading, y no neglisha pa haya un trabao of no perde trabao. Pero gobierno no a yuda e hendenan aki cu job coaching, training etc segun minister Croes.

‘Tene nan man’
P’esey mes e pilot project di e gobierno nobo ta cu 15 hoben cu ta cobra bijstand, ta wordo compaña, pa asina identifica for di cobra bijstand, ta desemplea, haya un training, haya trabao y keda cu e trabao, segun e mandatario.

“Nos mester compaña nan durante henter e proceso aki y tene nan man. Y esey ta loke mi ta haya tabata ausente tur e temponan aki.” No solamente hoben pero cualkier persona cu ta cobra bijstand mester tene su man segun gobierno. Tin hopi hende cobrando bijstand a perde balor pa nan propio bida y bida di nan famia, como tambe balor pa tin un soño y vision pa yega na algo, sr. Croes ta splica. “Y dado momento pa bo pone nan haya un trabao bek bo mester pone nan haya balor pa nan propio bida bek.”

P’esey mes a revoca e maneho bieu aki cu na momento DPL notifica na di tres biaha cu nan no a bin raporta, cu mester kita nan bijstand pasobra esey tabata e ordo. Minister Croes ta bisa cu e aspecto social a haya e atencion principal di henter nan gobierno y nan ta dunando tur e atencion y prioridad cu merece. Tur sector ta trahando hunto riba esaki. “Mi no ta un profesional den e sector social, mi no a wordo forma den e sector social. Obviamente bo tin e sentimento social. Si tin algo cu mi kier haci ta pa stuur e energia, esfuerso di tur instancianan den sector social pa nos por logra un resultado cu nan tin ya caba den nan propio capacidad di experiencia. Tin asina hopi talento di tur e fundacionnan y departamentonan di gobierno riba e temanan aki, tin suficiente conocemento profesional pa sa ki solucion y caminda pa cana. Y nos a compromete como gobierno na implementa nan.

Departamento bou evaluacion despues caso Paul Croes
DPL ta un departamento cu a pasa sigur den añanan critico segun minister Croes unda cu tur e investigacionnan di ontheffing nan (excepcionnan) a tuma luga na raiz di e maneho di e minister anterior. E situacion di DPL ta awor bao evaluacion di gobierno segun minister Croes. E mandatario ta bisa cu na comienso di januari e lo ta reuniendo cu tur e topnan y departamentonan den DPL. Ya caba e mandatario a cuminsa tuma accion den e area aki caminda cu manera conoci a para cu ontheffing nan, y ontheffing nan cu no a wordo otorga pa yega na un permiso tambe a wordo para pa wordo revisa.

Citgo Desk elimina
Pa loke ta trata e institucion di Oil & Gas Industry manera conoci a elimina e Citgo Desk bieu anto institui e Oil & Gas Industry Desk. Tur e ekiponan nobo cu a wordo cumpra pa e Citgo Desk bieu a wordo entrega siman pasa na oficina di gobierno tambe segun minister Croes. “E intencion di e maneho cu mi lo hiba ta pa e Oil & Gas Industry Desk ta esun responsabel cu tur autoridad pa sigura cu nos trahadonan local haya trabao den industria. Pero tambe si dado momento mester duna un declaracion pa un persona cu specialismo cu no tin na Aruba, pa e Oil & Gas Industry Desk aki ta esun cu lo tin e autoridad pa otorga esakinan.” E modelo aki lo kier uza pa otro modelonan den diferente sector asina e mandatario ta splica.