Trahadonan di Arubaanse Wegenbouw ta kitando tubonan di asbest entre otro den Schelpstraat na Playa pa reemplasa cu un sistema di riool nobo. Pero e caya aki no ta cera y publico por yega cerca, mientras ta core riesgo pa nan salud. Tambe comerciantenan den e caya ta preocupa.
Bon Dia a bay investiga e caso despues un comentario riba Facebook cu publico ta cana sin proteccion den e caya mientras e contractistanan ta full proteha manera ‘biohazard’.
E supervisor di e proyecto ta contesta Bon Dia cu nan ta percura pa saca tur e tubonan di asbest mainta trempan prome cu e tiendanan habri. Pero tin prueba cu ta sacando tubo moment cu e tiendanan ta habri.
Un di e tiendanan, Salina Department Store, ta comunica cu nan ta spera cu e trabaonan lo keda finalisa mas lihe cu ta posibel pa motibo cu e ta afectando nan negoshi y clientenan tin miedo di pasa manera cu nan mira tanto construccion tumando lugar. E comerciante di e tienda aki ta agrega tambe cu aunke cu nan a haya aviso den un carta for di DOW tocante trabaonan di asbest, ningun persona a acerca nan pa papia cu nan personalmente tocante esaki y duna nan un splicacion mas formal.
Mas detaye di storia aki por lesa den Bon Dia Aruba di mayan.
