Kitamento di tubonan di asbest na Playa ta continua

 Trahadonan di Arubaanse Wegenbouw ta kitando tubonan di asbest entre otro den Schelpstraat pa reemplasa cu un sistema di riool nobo. Pero e caya aki no ta cera y publico por yega cerca, mientras ta core riesgo pa nan salud.

Bon Dia a bay investiga diaranson e situacion despues riba Facebook ‘Tiruriruriru Tatitan’ a comenta esaki riba diamars: “Tin hende cu ta cana drenta pacus cu nan yiu y ta ripara e trahadonan bisti manera si tin “biohazard”, y bo ta wak e duda den nan body language. Otronan no ripara nada y gewoon sigui cana mientras cu un backhoe (!) ta wordo uza pa los (spera e cos ey no kibra, pero hey:”Murphy’s Law”) e tubo pida pa pida.”

Sinembargo e supervisor di e proyecto, Lucas Mercedes, ta bisa Bon Dia cu nan ta percura pa saca tur e tubonan di asbest mainta trempan prome cu e tiendanan habri y nan ta hinca nan den un bari pa tira nan afo. E ta informa cu no ta cla ainda, e trabao aki lo continua pa algun dia mas.

Comerciante preocupa
Pero comerciantenan den e caya  ta bisa Bon Dia cu nan ta preocupa. Tambe tin prueba cu e tiendanan ta habri ora di a saca tubo.

Gerente di ‘La Aruba’ ta comenta cu no a haya ningun splicacion specifico ni instruccion di siguridad. Empleadonan ta preocupa tambe pa nan salud.

Salina Department Store ta comunica cu nan ta spera cu e trabaonan lo keda finalisa mas lihe cu ta posibel pa motibo cu e ta afectando nan negoshi y clientenan tin miedo di pasa manera cu nan mira tanto construccion tumando luga. E comerciante di e tienda aki ta agrega tambe cu aunke cu nan a haya aviso den un carta for di DOW  tocante trabaonan di asbest, ningun persona a acerca nan pa papia cu nan personalmente tocante esaki y duna nan un splicacion mas formal.

E comerciantenan a ricibi e carta di DOW na december caminda ta para cu e trabaonan general pa e ‘Renobacion Proyecto Urbano’  lo cuminsa dia 11 di januari y caba riba 13 di mei. Riba e carta ta para cu pa un periodo di 4 siman nan lo ta sacando e tubonan di  asbest bou tera.

Segun Jossy Kock di DOW, e tubonan cu nan ta kitando tin mas cu 30 aña bieu y e ta causando basta problema.  Na diferente parti e tuberia
a kibra caba y nan mester a drecha esaki.  Pa e motibo aki mester cambia tur e tubonan di henter e caya pa no haya mas  problemanan manera esaki pa e proximo 30 aña of mas,