Aruparking ainda ta pone klem si automobilista ta para robes. Esaki e vocero Sannin Daou ta informa.
“Mester corda cu locual a wordo menciona cu ta bay tin kitamento di klem no ta al caso ainda. Te ainda si bo para fout , nos lo pone un klem. P’esey nos kier pa tur hende ta bon na altura y cauteloso.”
Tabata net algun dia despues di e retiro di Otmar Oduber como Minister di Turismo, Transporte & Cultura, cu Prome Minister Mike Eman a anuncia algun cambio den maneho di Aruparking.
El a papia di algun cambionan cu tabata den evaluacion caba y cu nan no por a introduci mas prome pasobra ainda tabata tin diferencia di opinion y discusion entre ministernan riba e tema.
Un di e prome cambionan pa implementa tabata e orario di paga cu a bira te cu 3’or di atardi enbes di 7o’r di anochi. “Esey sigur mi ta kere ta bay yuda trece mas cliente den caya grandi y sigur ta bay yuda tambe pa esunnan cu tin negoshi den caya grandi. Esunnan cu ta mercadea den tiendanan den caya grandi en todo caso lo mira cu gobierno ta haci di su parti pa nos entusiasma nan tambe pa mira e otro aspectonan cu ta di mes balor cu naturalmente e efecto cu e pagamento di parkeer tin.” Locual Minister Eman a menciona tambe tabata ta cu lo bay over na ” sconde e klem geel mahos ey” sin embargo, esaki no a wordo implementa mirando cu e ta den evaluacion ainda. Riba rednan social, algun hende ta comenta cu nan tabata bao di e impresion cu e klem a wordo elimina caba pero esaki no ta e caso ainda segun Aruparking. Bon Dia Aruba ta pendiente cu gobierno y Aruparking pa mira con ta bay sigui cu esaki.
Actividadnan den Caya Betico
Dianan di fiesta ta nos dilanti cual kiermen inicio di varios actividad como tambe e temporada di haci compras unda cu mas hende mester bishita Caya Betico Croes. Aruparking tambe lo ta cooperando cu algun actividadnan den e dianan di fiesta nos dilanti pa yuda alivia clientenan di caya grandi. Cuminsando cu un actividad den Caya Betico Croes diasabra awo den e area rond di Djiespie’s Place. Santa Rosa lo bay organisa un actividad eynan manera cu nan ta custumbra di haci cu tur nan hendenan y diferente productonan na benta.
Pa e actividad aki segun sr. Daou, Aruparking a dicidi pa tambe coopera den nan banda anto ofrece parkeo gratis for di 12’or pa 3’or riba e dia aki. pues pa ta cla: riba e dia aki for di 9’or di mainta pa 12’or di merdia tur cos ta bay ta normal cu parkeo paga manera custumber, anto desde 12’or en adelante lo bay tin parkeo gratis solamente den e area di Djiespie’s Place. E zona L banda di Radioshack, zona N cual ta na banda di La Granja como tambe zona O unda ta cay bao Botica Oduber siguiendo bay Toys 4 Us. For di La Granja bin pariba como tambe for di Radioshack bin pariba lo keda cobra normal te cu 3’or di atardi cu tur tarifa mescos manera semper.
Den cuadro cu esaki Aruparking kier a recorda tur hende cu: “Parkeo gratis ta conta solamente pa e vaknan blanco. Ora cu tin parkeo gratis, sea di 12 pa 3 of despues di 3’or, e reglanan di parkeo ta keda igual. Esaki kiermen cu bo no ta parkeer den un vak geel pasobra esaki ta destina pa e personanan cu tin permiso cu a paga. Esaki tambe kiermen cu bo no por para riba acera of un caminda cu no tin vak pasobra e ora ey nos lo bay over na klem. “
