Den fin di siman e prome kiosco na Eagle Beach a celebra e hecho cu a yega e punto mas halto di e edificio. Ta trata aki di un kiosco cu lo tin tur e facilidadnan necesario pa usuarionan di beach manera entre otro un espacio cu lo por cumpra cos di bebe y di come, bañonan tanto pa hende homber como pa hende muhe, lo tin tambe e facilidad den e baño pa cambia bruki di baby, caminda pa refresca curpa cu douche y mas cu tur cos un espacio cu por tuma un poco sombra sinta relaha na momento cu e solo bira un poco fuerte.
Ta bon conoci cu den e maneho di Minister Otmar Oduber a crea un plan pa baha e presion di e cantidad di turistanan di barco crucero cu ta haci uzo di e beachnan den e area di high risemirando cu aki tin tur e facilidadnan cu e otro beachnan no tin. A crea algun facilidad manera na Nikki Beach como tambe na Arashi. Awor ta asina leu cu Eagle beach tambe ta haya su facilidadnan. Mientras cu e prome dos kiosconan a keda financia pa TPEF e proyecto aki ta keda financia pa ATA. E dos kiosco na Eagle Beach cu ta un inversion di alrededor di 700 mil florin na bienestar di Producto Aruba. Ta un plan cu ta encera hopi mas cu solamente e kiosconan aki. Recientemente a termina tambe e prome fase di e proyecto di mehoracion di awa di lama di Surfside Beach te cu e beach dilanti Gobernador su cas na playa. E proyecto aki cu tambe a keda financia pa ATA, a encera cu a saca hopi sushedad cu tabatin den e awa laba e santo y pone santo blanco den e area aki elevando asina e calidad di beach.
Regulacion di nos beachnan den e Beach Policy tambe ta un otro aspecto y ta cana den mesun direccion pa locual ta trata mehoracion Producto Aruba. Cu un miho structura riba nos beachnan y tambe den lama tin miho control pa locual ta encera siguridad pero tambe un bista mas ameno pa e usuarionan di beach.
Mientras cu a celebra ‘spantenbier’ na e prome di e dos kiosconan situa na Eagle Beach, mester bisa cu e di dos no ta mucho leu di yega su punto di mas halto. Dentro di poco lo tin un celebracion mas.
Intencion ta pa crea mas di e facilidadnan aki entre otro un otro pariba di brug den e area di Noord Cura Cabay/ Zeewijk. Tur e esfuersonan aki ta pa asina nos bishitantenan tin mas opcion pa haci uzo di e gran cantidad di nos beachnan pero tambe pa nos localnan cu lo por gosa di beachnan di un calidad hopi mas halto.
