Ayera mainta, den presencia di algun medionan local Kinsasha Thielman-Van der Bliek a anuncia su decision di retira for di partido RED Democratico debi na acontecimentonan cu el a experiencia recientemente den partido y ademas debi na e liderazgo di e partido.

Den su declaracion Thielman-Van der Bliek a informa cu dia cu gobierno a cay 9 di september ultimo, RED a acerca na dje pa oficialmente e bira candidato, pa esaki, el a pidi tempo di dos siman pa por a duna su contesta manera el a sigura.

El a bisa cu den e dos siman ey a tene conversacion cu miembronan di partido, tanto cu e lider, esta, Ricardo Croes y tambe Rudy Lampe, di e conversacionnan aki manera el a bisa, Croes a tuma ofensa di un punto cu Thielman-Van der Bliek a trece dilanti y par di dia despues el a pidi pa Thielman-Van der Bliek retira for di e partido.

“Si mi ta cuestiona con e proceso a tuma luga pa Ricardo a tuma e accion pa informa mi di su desicion. Statutonan di RED ta stipula den articulo 13.7 lo siguiente: Bestuursbesluiten kunnen ook buiten de vergadering worden genomen, doch dergelijke besluiten zijn alleen geldig, indien alle in functie zijnde bestuursleden het besluit unaniem en schriftelijk hebben aanvaard. Ricardo a yama miembronan di directiva y no a haya consentimento y tampoco sosten unanime di tur miembro pa por a yama mi y informa mi e desicion aki,” Thielman-Van der Bliek a bisa.

El a agrega cu dia 29 di september bestuur a tene reunion y den e reunion aki Croes “a busca pa bestuur ‘second’ y sostene su decision y e mayoria den bestuur a sostene e desicion aki. Tabata tin desacuerdo tambe cu e decision aki, mas e oposicion aki tabata den minoria.” For di e reunion aki a sali algun argumentonan secundario pa sostene e desicion pa Thielman-Van der Bliek no subi lista como candidato.

Segun e ta señala, e argumentonan di Croes tabata cu “el comunica cu mi cu el a tuma e decision a base di e conversacion cu mi a purba hiba cune dia 23 di september den cual mi a trece dilanti cu mi ta observa un desbalans interno, un conflicto interno entre su ego y amor propio el a tuma ofensa y nos no a logra elabora riba esaki. Tambe cu el a tuma ofensa di conversacionnan cu Rudy a inicia cu mi contemplando posibilidad y e momento adecuado pa cambio di liderazgo di Ricardo pa mi persona y cu el a tuma e decision a base cu e ta kere cu no permiti mi subi lista lo satisface mi necesidad di ta liber den mi expresion.”

Pa loke ta trata e argumentonan di bestuur, el a informa cu tabatin di haber cu Thielman-Van der Bliek a laga e partido den inseguridad.

Sinembargo, e ta sigura cu “desde 2017 te cu awo mi ta bin ta miembro activo di RED, a bin ta sostene nos causanan y visionan fervientemente, mi a haci mi miho intento den

desplega un voorzitterschap visionario y proactivo y a keda duna input como consehero

despues di mi retiro di e funcion aki. Mi a comunica cu mi tabata tin mester tempo pa por a una un contesta ariba e peticion pa subi lista y a concede mi e tempo aki y despues a perde pasenchi cu mi proceso. Mi proceso tambe merece pasenchi y respet”

E ta conta cu como consehero den reunion pa establece tono di campaña, el a propone pa yega na “un balans entre REDsistencia y presenta speransa y creacion.” Despues di e reunion aki bestuur por a wak’e den momentonan di resistencia/protesta cu e Land Back movement.

“Bestuur ta argumenta cu a pidi mi pa no post mi mes humando cannabis of haci esaki

live riba social media, cual peticion a wordo haci nami den luz di mi caso cu tabata

andando ainda contra di gobierno. E peticion aki na a wordo haci na mi como

miembro, consehero of candidato y cu ningun otro argumento cu no ta solamente pa no perhudica mi caso.

Di cu el a haya su veredicto, e cual el a perde el a dicidi di cende un joint di cannabis y post esaki den forma di potret riba social media como “un accion di REDsistencia! Esaki ta e manera con mi ta carga e causa den expresion genuino di ken mi ta, Mi no ta goberna pa miedo! RED ta practicamente usa e causa contra mi y kier crea un limitacion den mi expresion genuino. Si mi ta enfatisa cu si RED lo a haci mi e peticion aki como candidato, mi lo a scohe pa sacrifica e parti aki di mi libertad pa e ‘greater good’! Mi a bin ta haci’e 3 aña caba, algun siman mas no lo tabata ningun obstaculo.”

 

E argumentonan aki a ser usa pa sostene e conclucion cu esaki ta trece e uniformidad den presentacion di candidato na riesgo.

Den su opinion, el a experiencia den partido RED cu “e lider cu ta experencia un conflicto interno den amor pa su mes, batayanan y dolornan manera cualkier otro persona/humano por experencia, y esakinan ta refleha den su relacion cu e mundo externo, tambe den politica. Un liderazgo cu ta struggle cu confiansa, hasta den nos mesun seno. Un liderazgo y bestuur cu por comete eror, pero cu den un momento asina cardinal aki no tin e habilidad di refleha, wak su mes, coregi su mes y tuma e accionan

necesario pa remedia y scohe pa bienestar general en bes di satisface e impulso di sentimentonan di e lider. Un bestuur cu no ta vocifera diferencia di opinion cu liderazgo of coregi constructivamente den miedo cu esaki lo wordo interpreta como ofensa y nan wordo haci enemigo y por ultimo mi a experencia un proceso cu NO a refleha democracia transparente y esaki tabata e gota final,” el a sigura.

Tambe, el a trece dilanti cu e partido si tin visionan y proyectonan pa presenta y pa sirbi e pais y hendenan, pero cu e decision cu nan a tuma, Thielman-Van der Bliek ta sinti cu esaki ta mustrando e cu den e momentonan aki den entorno di RED no ta su luga y unda e mester ta.

“Si mi ta convenci cu mi desicion pa separa for di RED den e momentonan aki ta den mi

bienestar personal, pa duna mi mes e espacio cu mi tin mester y ta desea, y tambe pa tuma mi libertad den expresion completo di mi mes y ken mi ta. Y cu tur loke ta sucediendo lo tin su efectonan positivo a largo plazo pa RED y e causanan cu nos tin en comun. RED ta nenga mi subi e plataforma como candidato y a haci peticion pa mi keda miembro y consehero pa den e formato aki duna mi input. Y mi no ta mira mi mes den esaki. Cu esaki tambe ora mi ta entrega mi retiro como consehero y miembro di partido Red Democratico.” Thielman-Van der Bliek a declara.

Su decision pa retira for di partido ta “prome cu tur cos den amor pa mi mes, amor cu mi ta brinda mi mes den conocemento di mi poder y balor y ademas ta basa cu mi no ta resona mas cu e tipo di liderazgo cu ta eherciendo den RED y un proceso no transparente cu a cana pa logra hancra e desicion den impulso di Ricardo Croes, el a finalisa.