(AP) — Lider di Nort Korea, Kim Jong Un, a priminti pa implementa e politica anti-Mericano “mas estricto,” segun medio estatal a informa ayera, menos cu un luna prome cu Donald Trump asumi su cargo como presidente di Merca.
E regreso di Trump na e Cas Blanco ta crea expectativa halto pa diplomacia di perfil halto cu Nort Korea. Durante su prome termino, Trump a reuni tres biaha cu Kim pa dialoga riba e programa nuclear di Nort Korea. Sinembargo, hopi experto ta bisa cu no ta hopi probable cu e cumbre entre Kim y Trump lo cuminsa atrobe pronto, pasobra Trump lo duna prioridad na e conflictonan di Ucrania y Medio Oriente. Sosten di Nort Korea pa e guera di Rusia contra Ucrania tambe ta pone un desafio riba e esfuersonan pa rebiba diplomacia, segun expertonan.
Durante un reunion plenario di cinco dia di e partido gobernante, Partido Laboral, cu a caba diabierna, Kim a yama Merca “e estado mas reaccionario cu ta considera anti-comunismo como su politica estatal invariable.” Kim a agrega cu e colaboracion di seguridad entre Merca, Sur Korea, y Hapon ta crece den un “bloc militar nuclear pa agresion.”
“E realidad aki ta mustra claramente den ki direccion nos mester avansa, kico nos mester haci y con nos haci’e,” Kim a bisa, segun e agencia di noticia oficial Korean Central News Agency (KCNA).
E agencia a agrega cu e discurso di Kim “a aclaria e strategia pa e contra-accion anti-Mericano mas estricto ser implementa agresivamente” pa defende e interesnan nacional y seguridad di Nort Korea pa un largo plazo.
KCNA no a detaya riba e strategia anti-Mericano. Pero e medio a informa cu Kim a presenta tareanan pa fortifica e capacidad militar via avancenan tecnologico di defensa y a resalta e necesidad pa mehora e resistencia mental di e soldadnan di Nort Korea.
E reunionnan anterior entre Trump y Kim no solamente a pone un fin na nan retoricanan agresivo y menasanan di destruccion, pero tambe a desaroya conexionnan personal. Trump un biaha a declara famosamente cu e y Kim “enamora.” Pero nan dialogo eventualmente a collapse na 2019, ora nan no a por yega na un acuerdo riba sancionnan lidera pa Merca contra Nort Korea.
Despues di esaki, Nort Korea a aumenta rapidamente nan actividadnan di prueba di arma pa desaroya misilnan nuclear mas confiable dirigi riba Merca y su aliadonan. Merca y Sur Korea a responde por medio di aumenta nan entrenamento militar bilateral y tambe trilateral cu Hapon, algo cu Nort Korea ta percibi como ensayo pa invasion y cu a provoca rechaso fuerte.
Esaki ta complica mas e esfuersonan pa convence Nort Korea pa bandona su arma nuclear den cambio pa beneficionan economico y politico. Adicionalmente, e cooperacion militar entre Nort Korea y Rusia ta sigui desaroya.
Segun evaluacionnan di Merca, Ucrania y Sur Korea, Nort Korea a manda mas cu 10,000 trupa y sistema di arma convencional pa sostene e guera di Rusia contra Ucrania. Ta preocupa cu Rusia por duna Nort Korea tecnologia avansa di arma como intercambio, incluyendo yuda desaroya misilnan nuclear mas poderoso.
Presidente di Ucrania, Volodymyr Zelenskyy, a bisa siman pasa cu 3,000 trupanan di Nort Korea a ser mata y herida durante bringamento den e region di Kursk na Rusia. Esaki tabata e prome calculacion significativo di Ucrania riba e perdidanan di Nort Korea desde cu nan a cuminsa desplega trupa na Rusia den october.
Rusia y China, den nan mesun disputa separa cu Merca, a blokia repetidamente e esfuersonan lidera pa Merca pa pone mas sancion di ONU contra Nort Korea, apesar di nan prueba di misilnan repetitivo desafiando e resolucionnan di e Conseho di Seguridad di ONU.
Luna pasa, Kim a declara cu nan negociacionnan anterior cu Merca a confirma e hostilidad “consistente” di Washington contra su pais y a bisa cu su deposito nuclear ta e unico manera pa combati menasanan externo.
