Lo tin manifestacion awe tardi contra abuso di bestia

Despues di un ola di comentario den comunidad contra e Kill Cage na Wayaca, departamento encarga, esta Veterinaire Dienst cu ta cay bou Departamento Salud Publico ta bisa cu lo cambia maneho unda ta acepta solamente cachonan cu ta den mal estado y no bestianan ainda den bon salud.

Riem van den Berg di Veterinaire Dienst y director Jerry Staring di Departamento di Salud Publico a haya cu nan mester a bin dilanti pa splica riba e maneho cu ta hiba cu bestianan indesea na Wayaca. Pasobra segun nan, nan a wordo confronta cu yen di speculacion. Manera nos a publica cu entre otro tin maltrato di bestia andando eynan, den forma cu ta kita bida di e bestianan aki na un manera cruel. Esaki tabata comentarionan cu algun hende a subi riba rednan social algun dia pasa y causa un ola di reaccion negativo contra e maneho aki. “No tin otro maneranan cu nos ta deshaci di e bestianan aki”, sr. Riem v/d Berg ta splica. E unico solucion ta keda educacion/conscientisacion di un comunidad pa locual ta trato di bestia segun nan.

4 pa 5 mil bestia mata
Sr. v/d Berg ta bisa cu kisas den futuro lo haci adaptacion den e Kill Cage pa asina tin un limitacion riba e bestianan cu por trece eynan. “Pues cu nan lo ta solamente bestianan cu tin algun malesanan of cu a yega na edadnan bieu of cosnan asina.” Aworaki cantidad di cachonan y pushinan jong anto den bon salud ta esunnan cu ta keda wordo hiba eynan. Tur aña un cantidad di 4000 pa 5000 bestia ta wordo laga atras pa nan doño na e Kill Cage, sr. v/d Berg ta conta.

Manifestacion
Awe tardi 5or e grupo Crijojo Trappers ta organisa un manifestacion dilanti di e Kill Cage na Wayaca pa asina protesta contra abuso di bestia. E preocupacion den comunidad den cuadro cu e topico aki ta varios. Nos matutino mes a yega di publica tambe varios biaha riba kehonan contra e maneho aki na Wayaca. Servicio di Veterinario ta sigura cu e motibo pa kico e luga aki ta existi ta pa preveni cu bestianan no desea bay riba caya anto aumenta e problema aki na Aruba. “Bestianan cu ta wordo laga atras na e Kill Cage, servicio di Veterinario ta pone nan drumi na un manera responsabel haciendo uzo di un inyeccion cu ta internacionalmente conoci”, segun sr. v/d Berg.

Comunidad mas responsabel
Director di departamento di Salud Publico Staring: “Nos tin un realidad unda nos tin un Kill Cage na Aruba cu ta sali for di e falta di un trato responsabel pa nos bestianan, nos sa esey.” “Henter e punto akinan ta cu nos na Aruba mester cuminsa bira mas responsabel pa cuido di nos bestianan segun e departamento a subraya ayera. Nos mes a tuma nota di algun cacho cu ta los eybanda mes den e bario di Wayaca pero no a logra haya ningun comentario di habitantenan den e area. Gobierno ta stimula campañanan di sterilisacion bao bestianan cu ta los riba caya pa purba reduci e cantidad, pero falta hopi pa haci ainda”, segun e departamento den nan relato. Nan ta subraya cu na momento cu un persona ta desea un bestia of mascota e mester ta consciente cu e ta responsabel na tur momento pa cuido di e bestia.