Na Aruba tin varios iniciativa pa rescata nos bestianan. Pero asina mes y cu e ley di cacho cu tambe ta encera un miho cuido, e problema di cacho riba caya ta keda grandi.

Anouk Raaphorst tin un aña trahando den Animal Rescue y ta comparti cu Bon Dia Aruba kico tur el a siña te awo. Tin como ocho grupo cu ta traha den Animal Rescue incluyendo e shelter na Wayaca. Den e kill cage na Wayaca, e ta informa nos cu pa aña  mas o menos 8.000 – 10.000 animal ta wordo mata. Cada cacho cu ta wordo rescata for di caya of di un doño iresponsabel, ta costa mas o menos 300 te 500 florin pa drecha su enfermedadnan. Esaki ta pa cubri vacuna, sterilisa, antibiotica y mas. Sra. Raaphorst: “Tin un grupo di por lo menos 40 persona cu ta rescata e animalnan en total anto nunca den nan bida nan lo por resolve un problema asina grandi di miles y miles di cacho riba caya. Si nan por rescata 100 cacho pa aña, esey ta trece un gasto di 300.000,- pa  500.000,- florin pa aña. 95% di e placa pa paga esaki ta bini di turista cu ta haci donacion.”

Cantidad di cacho mester baha
“Si tur hende ta yuda y bira responsabel pa su mesun bestia , e problema aki por wordo soluciona. E responsabilidad no mester cay riba e gruponan di rescate ni tampoco riba gobierno. Cada ciudadano mester cumpli cu su parti,” sra. Raaphorst ta splica. Rescate di bestia ta un gasto enorme anto segun e ta bisa, tanten cu hende no cambia nan manera, cos no lo cambia aunke bo habri 10 shelter mas. “Si bay rescata cuater puppies di un cas – nos ta bay gasta 1200 florin riba nan. Cu e gasto di 200 florin pa sterilisa e mama, nos por a evita e puppies di nace y spaar 1000 florin. Cu e placa aki bo por sterilisa 10 otro cacho.”

Animal Abuse Report
Sra. Raaphorst ta conta nos cu e problema aki a dun’e e idea pa habri Animal Abuse report Aruba.  Esaki ta un team di hende cu ta rescata animal cu a crea un pagina online pa cuminsa uza social media como un plataforma pa conscientisa publico di Aruba.  Via di esaki ta post potret di caso cu tin bon prueba cu e animal ta den mal estado. Tambe ta post casonan cu por educa otro doño di animal.

“Ora nos ta haya mensahe ta purba acerca e persona pa papia y wak kico nan mes por haci. Si nan no ta logra y nos ta wak riba potret cu nan ta kibrando ley, nos ta yama polis. Ainda nos no tin suficiente polis cu ta hopi activo den casonan di animal. Tin caso unda a yama e gruponan di rescate y wak si un di nan por bay na e adres. Hasta den varios caso un ciudadano a purba di convence e doño di laga cacho bay.” E no ta leuk pa sali den social media como un abusado di animal, pero sra. Raaphorst ta bisa cu ta spera cu e ‘fama’ ta pone hende pensa dos biaha. E ta pensa cu kisas saliendo riba social media como abusado di animal ta bay yuda drecha e situacion di animal.

Prome boet a cay
Den algun caso e doño di e cacho a wak e post di nan cacho riba social media y drecha e situacion mesora como tambe mehora trato pa e animal. Den varios caso polis a bay papia cu e doño y nan a los e cacho di cadena cortico y a duna advertencia na e doño. E siman cu a pasa mes sra. Raaphorst ta conta nos cu  Kenny Montero a parti e prome boet na un ciudadano cu a laga su animal muri di hamber. “Mi kier por yega na mas hende cu ta posibel pa purba educa nan riba e problema aki. Nos mester comunidad presta mas atencion riba esaki pasobra solamente nos por trece cambio.”