E kill cage teribel cu tabata pone Aruba su cara den berguensa riba derecho y trato mas humano cu bestia, specialmente cacho, ta mustra cu a bira cos di pasado. Ayera a tuma luga e inauguracion di Centro di Control di Cacho den e mesun sitio unda kill cage tabata situa na Wayaca.

Ademas cu e sitio a adopta otro nomber mas nechi, e centro aki ta mas grandi cu e kill cage di pasado. Nan tin otro tipo di instalacion y maneho pa loke mester bira e decision final di sacrifica of no e bestia no desea cu ta wordo bandona pa su suerte den e centro aki.

Prome Minister, Evelyn Wever-Croes a bisa cu Aruba tabata bibando pa hopi tempo cu e problema di hendenan cu tabata bin den e sitio aki, y laga nan cacho atras pa pone drumi. E situacion aki tabata wordo desaproba tanto pa nos hende local como turistanan cu ta stima bestia, y nan no tabata aproba con e esaki tabata bay. P’esey a dicidi haci algo pasobra un pais cu ta respeta su animalnan ta refleha su compas moral, el a bisa.

For di aña pasa nan tabata trahado riba un plan nacional pa atende cu e problema aki, caminda e centro cu a keda inaugura ayera ta un parti fundamental di dje. Cu e centro aki polis por ehecuta e ley di 2015 conoci como Ley di Cacho. E ley aki ta podera polis pa recoge un cacho cu ta riba caya y hib’e un shelter. No tabatin shelter y esaki ta e motibo cu nan a bin cu e centro aki. E meta tras di esaki ta cu e problema grandi di cacho cayehero lo por bira un cos di pasado.

Regla

Si e cacho tin un doño responsabel y bo ta sinti falta di bo mascota, bo tin tres dia so pa busca bo cacho bek den e centro aki. Si e cacho tin un microchip cune e ta bira 10 dia. Si den e periodo ey bo no ta busca bo cacho den e centro aki, y niun otro instancia ta adopta e cacho den e tempo ey, lamentablemente nan mester pon’e drumi.

E ta haya e punto aki importante pa pone atencion riba dje. Si cada un di nos ta cuida nos mascota manera debe ser e no ta bira un problema di gobierno. E intencion tras di e centro aki no ta esun di busca un solucion facil pa doño di cacho bin benta su mascota den e sitio aki, ora cu e mascota ta bieu, malo of nan no kier cuid’e mas. El a haci enfasis cu e cuido di bo mascota ta den bo man. Ora bo tin un mascota bo mester bira un doño responsabel, y esey ta para den ley tambe.

E cambio di nomber di kill cage pa Centro di Control di Cacho tambe tin un pakico. Tin un periodo cu e cacho ta keda den e centro aki caminda e ta haya cuido bao gasto di gobierno, prome cu tin un decision final riba dje. Antes e fundacion tabata haci’e nan so. Pero e biaha aki gobierno a dicidi traha hunto cu e partnernan riba e tereno aki pa atende cu e problema di cacho riba caya.

Minister Presidente ta haya cu e cambionan aki compara cu pasado ta no substancial cu na su parecer ta pone Aruba den un posicion mas halto mundialmente pa loke ta trata cuido di bestianan, den e caso specifico aki cacho. Encuanto e prioridad di bin cu e centro aki awor cu nos ta pasando den un crisis, e ta haya cu e prioridad ta diferente pa tur hende.

E gobernante ta haya cu pa gobierno cu ta percura pa interes general a bira un prioridad pa atende cu e problema di abuso y negligencia di cuido di cacho. El a bisa cu e tema di cacho di caya ta afecta tur habitante di nos pais. P’esey nan a dicidi di bin cu un plan caminda a wordo institui un comision. Mientras cu Premier Wever-Croes su ruman Irene, kende ta veterinario na servicio di gobierno, a yuda pa diseña e plan aki.

Segun MinPres esaki ta e prome stap di implementacion di e plan aki. Nan ta bay evalua regularmente con e ta bay prome. E plan aki ta bay conhuntamente cu un programa di sterilisacion y campaña di conscientisacion. E intencion ta pa nan por ampli’e. Tambe tin plan pa atende cu e pushinan cu tambe mescos cu cacho a bira un molester den comunidad.

No tin un ley pa atende cu e molester di pushi ainda. E mesun centro aki tin poco espacio pa atende cu pushi, mientras cu tin hendenan cu tambe ta trece nan pushinan pa deshaci di nan.