Te ainda Prome Minister Evelyn Wever Croes no a reuni cu Minister Marisol Lopez Tromp. Y Segun Prome Minister ayera, el a manda pidi pa un reunion pero e no a haya reaccion. Esaki el a bisa despues di a tene su audiencia semanal cu Gobernador.

Na su yegada na Bestuurskantoor, tabatin un grupo selecto di prensa ya prepara pa e declaracionnan di Prome Minister, kende a bisa cu no por laga e problema rek mucho largo mas. “Mi ta bay pone presion pa e reunion aki sosode hopi lihe, pa asina pone cosnan cana manera nan mester cana.”

Evelyn Wever Croes a bolbe referi na e reunion den Parlamento di Aruba, unda e ta bisa cu tin un mocion cu a pasa. “Tin un discusion riba su legalidad of no legalidad. Pero e realidad y hechonan ta cu nos tin un situacion cu ningun hende por ignora. Y esey ta un situacion cu tin Minister cu no ta goza di confianza di mayoria di miembronan di coalicion. Di un Minister, cu no ta goza di confianza di henter Parlamento, pasobra ningun hende a keda pa bisa cu nan tin confianza den dje.”

Prome Minister a admiti cu tin Ministerraad cu no ta funciona debidamente y tin un crisis hopi serio pa atende cune de inmediato. “No tin espacio ni tempo pa perde cu e cosnan aki. Dus, no, mi no a papia cune ainda, pasobra e no a reacciona y mi lo bolbe insisti pa e reunion tuma luga mas pronto posibel.”

Nombracion na DIP y partimento di tereno

E periodista presente na e encuentro cu Prome Minister a puntra ki ta e berdad di rumornan cu Minister Marisol Lopez Tromp lo ta mete den maneho di DIP y ta percura cu ta nombra su hendenan den e Direccion y su departamentonan.

“Loke bo ta trece dilanti, mi tambe a scucha e rumornan cu tin cierto metemento den e Departamento di Infrastructura mes, tanto riba repartimento di tereno y hincamento di hende. Mi ta bay haci investigacion pasobra si ta asina, e ta hopi serio. Nos a palabra cu ora nos bin den Gobierno nos ta bin cu nos hendenan nos hendenan ta bay cu nos. Nos no por ta sinta yena hende den Gobierno awor aki cu nos tin tanto control di Hulanda. Pa loke ta terenonan, mi mes no por a kere, pasobra nos tin tanto investigacion,si no ta Avestruz ta Flamingo anto mi ta puntra mi mes ta kico mas nos kier? Nos kier pauwies y calacuna? Dus ta cosnan cu nos no por acepta, pues mi ta bay investiga esakinan.”

Prome Minister a bisa cu e ta sigura Aruba, cu ayera a keda bendiciona grandemente cu un pal’i awa, cu ta bay yega na un solucion. “Aruba ta confrontando retonan grandi. Nos tin e reto di Covid cu tin mi hopi preocupa y mi mester pone atencion na esey. Nos mester percura pa baha e cantidad di casonan. Pero tambe nos tin e situacion cu Hulanda cu ta bayendo bon.”

Evelyn Wever Croes, kende a bisa cu e acuerdo cu Corsou a haya cu Hulanda ta locual Aruba a yega na dje mas cu un luna pasa, a enfatisa cu poco poco ta yegando mas cerca di otro. Aki e ta referi na e ehempel cu e entidad lo bay mishi cu autonomia di Aruba. “Awor nos ta asina leu cu den e ley lo pone cu e entidad no ta mishi cu autonomia, ni autoridad di Gobierno ni di Parlamento. Esey mi ta considera un punto hopi crucial.” Pues Prome Minister ta positivo cu e deliberacionnan ta bayendo den direccion positivo.

“Mi mester dedica atencion na esakinan, ademas di diferente otro cos prome cu fin di aña. Awor cu nos a haya nos mes cu e asunto di Minister Lopez Tromp, mi ta lamenta. Mi kier sigura piscadonan cu nos ta bay atende cu e situacion. E piscadonan cu ta tira mester haya oportunidad pa gana nan man den forma honra. No ta ora pa nan haci nan bida mas dificil, pero cu nan mester haya oportunidad pa come.” Wever Croes ta bisa cu logico cu e mester bay cu regla, teniendo cuenta cu zona y leynan y tratadonan. Pero e ta lamenta cu a pesar cu a yega na un palabracion den Conseho di Minister, ta mustra cu Minister Lopez Tromp ta trece strobacion. “Gobernacion sinembargo no ta tranca e momentonan aki. E ta haci e funcionamento dificil si. Ami lo atende e asunto cu e Minister y despues den Ministerraad, pa finalisa e asunto aki for ‘once and for all.’