(AP) — Si bo kier baha peso y kier haya un manera nobo pa hacie, subi trapi como ehercicio regular – of djis agrega algun trapi pa dia – por ta pa bo. Si ta accesible investigacion ta mustra cu esaki ta mas efectivo cu cana riba piso normal.
“En general, ta un hecho cu subi trapi ta pone bo fit mas lihe y ta consumi mas caloria,” segun Lauri van Houten, vice-presidente di Federacion Internacional di Skyrunning, cu ta supervisa un variedad amplio di disciplina involucrando ascenso vertical.
Esaki ta inclui disciplina manera core riba montaña mas cu 2mil meter di haltura, of eventonan manera Campeonato Mundial di Subi Trapi.
E competencianan aki ta pa hende hopi fit, pero aki nos ta papia di agrega algun minuut di subi trapi como un rutina diario y genera consciencia tocante su efectividad pa tur edad.
“Con hopi caloria bo ta bay kima ta e pregunta cu tur hende kier sa,” Van Houten a bisa. “Aki tin e bon noticia: e gasto general di energia di e ehercicio ta depende riba bo peso. Pues, mas pisa bo ta, mas bo ta bay kima.”
Subi trapi ta kima caloria – lihe
Investigacion ta mustra cu bo ta kima como 20 biaha mas caloria subiendo trapi cu canando. Hasta bahando trapi bo ta kima como cinco biaha mas, e musculonan trahando pa slow e descenso di e curpa. Esaki por ta tur loke bo mester sa si bo ta purbando di baha peso.
Dr. Alberto Minetti, fisiologo y biomecanico na Universidad di Milan, a haci investigacion extenso di locomocion humano – incluyendo subi trapi. “E ta un ehercicio cu tur hende por haci,” Minetti a bisa AP. “Bo semper tin un trapi cerca – gratis compara cu gym.”
Minetti a haci e calculacion pa splica con subi trapi ta asina efectivo pa kima caloria den un tempo cortico. “Pa move un kilogram di masa corporal riba un meter horizontal, bo ta gasta 0.5 caloria,” el a bisa. “Si bo move 1 kilogram di masa corporal verticalmente riba trapi, e ta 10 caloria. Pues ta 20 biaha e cantidad di caloria moviendo verticalmente en bes di horzontalmente.”
Educa como dokter, Minetti a pasa su carera den investigacion en bes di tratando pashent. El a sugeri “check bo velocidad” pa e beginners cu no ta asina jong. E ta haci su propio subida di trapi na su residencia riba tercer piso na Milan. El a bisa cu hopi biaha e ta tuma respiracion profundo prome cu subi, cu ta lag’e sinti mas fresh ora e yega e top.
Den un estudio cientifico, Minetti a haci e punto cu usa e brasa den subi trapi ta agrega poder. Handrail ta ofrece seguridad tambe. E journal ta nota cu handrail ta disponible na mayoria di trapi den skyscraper, cu ta maximisa “e masa muscular involucra, y consecuentemente, e poder mecanico/metabolico di e ascenso” door di involucra e brasanan. “Nan ta musculonan relativamente chikito den brasa, pero miho cu nada,” Minetti a bisa.
Un bentaha grandi di subi trapi ta cu no ta tuma mucho tempo. Ta facil pa construi, agregando algun trapi cada dia of siman, y ta mehora balans. E desbentaha, ta cu no ta hopi bunita, particularmente riba edificionan halto.
Por incorpora subi trapi den bo rutina diario
Yuri Yoshizumi a gana e division femenino aña pasa den Campeonato Mundial di Subi Trapi na su ciudad natal, Osaka, Hapon. Tabata trata di un subida di 285 meter – 1,610 trapi – cu el a completa den 10 minuut, 20.06 seconde.
“Subi trapi ta un sport facil pa beginners y publico general cuminsa adopta,” Yoshizumi a bisa AP den un email. “Atletanan elite ta pusha nan mes hopi duro, pues ta hopi dificil. Pero ta bon pa bo pa reforsa bo musculonan y bo sistema cardiovascular den un tempo cortico.”
El a agrega cu otro bentaha, particularmente bibando den un metropolis grandi manera Osaka, ta cu “ta posible pa hacie den e ciudad.”
“Djis usa e trapi en bes di elevator of escalator den stacion di subway y tiendanan grandi ta un bon manera pa haci un tiki ehercicio,” el a bisa.
