E Comision cu a instala pa duna recomendacion encuanto e manera pa reorienta gasto di cuido medico, a entrega su rapport y nos por a tuma nota di e conclusionnan general. E comision corectamente a elabora riba e necesidad di cuminza implementa un maneho di prevencion, si den e proximo añanan lo mester yega na un maneho efectivo di enfermedadnan cronico. Y den cual ta mira un papel primordial di gobierno. Esey tambe ta corecto, pasobra den pasado hopi hende tabata enfoca riba AZV como e organismo cu mester desaroya un maneho di prevencion, pa den futuro por disminui gasto di cuido. Te algun aña pasa AZV tabata dedica un cierto suma – modesto – na informacion general encuanto un estilo di bida mas saludable, y e relacion di mal nutricion cu enfermedad cronico. Sin embargo, e maneho ey ta responsabilidad di gobierno, mas specifico ministerio encarga cu salubridad publico. Lamentablemente den ultimo añanan, mientras a spera un inicio di tal maneho, no a mira nada di esey. Mester bisa – pa tur claridad – cu den e gobiernonan anterior tampoco a mira tal maneho, cu ta asina necesario.

Un aspecto cu si a mira den ultimo periodo di gobernacion ta e mencion di e posibilidad di un impuesto riba sucu y bebida conteniendo sucu, e famoso ‘sugar tax’ cu finalmente no a implementa. Sin duda algun e recomendacion pa considera atrobe e medida aki lo trece hopi discusion, cu argumento valido y otro di indole dudoso. Esaki banda di otro medida di aumenta entrada envez di baha gasto cu nos lo trata despues. A pesar cu por mira e medida di un sugar tax primeramente como un manera pa haya extra placa den caha pa gobierno, ta necesario pa contempla con esaki lo por hunga un papel positivo den contribui na un dieta mas saludable. Esey ta obliga nos tira un vista mas detaya riba e situacion di mal nutricion, e relacion cu estilo di bida en general y e efecto devastador cu esaki tin den nos poblacion. Pasobra e problema no ta sucu so. Mal nutricion tin diferente componente, entre otro e consumo exagera di proteina y vet animal den dieta diario di gran parti di e poblacion. Nunca tabatin un discusion pa limita importacion di e tipo di vet aki, na fabor di azeta vegetal, por ehemplo den fabricacion di pan y den restaurant. Esaki mientras na otro pais mas avanza den e materia aki a haci un transformacion grandi caba, por ehemplo den e uso di manteca di porco pa traha pan y pa hasa cuminda (den restaurant).

E crisis di Covid a siña hopi hende aki tambe con importante un estilo di bida mas saludable ta. Ta di spera si cu ora e crisis caba di pasa, nos no bolbe na e situacion di antes, unda ta perde bon parti di e experiencia positivo aki. Lo ta necesario tambe pa revisa maneho di educacion fisico na scol, cu ta laga hopi di desea, unda ainda tin scol sin e debiso infrastructura. Igualmente e apoyo na deporte organiza, cu a pesar di e gritonan di euforia ta kedando leu atras compara cu e necesidadnan cu tin.

Nos no a mira ainda cifra di e presencia di por ehemplo persona cu problema di sobrepeso y obesidad den e casonan atendi na Hospital y mas specificamente den ICU. Den ultimo dianan den medionan Hulandes tabatin bastante atencion pa e resultadonan di e investigacion alrededor di Covid-19 na e pais, unda ta conclui cu tabatin un presencia desproporcional y fuerte di hende cu problema di sobrepeso y obesidad entre e personan cu a haya e coronavirus y a termina den hospital o ICU. Motibo pa pone mas enfasis riba inversion den prevencion, cu lo por ta por ehemplo 1 porciento di loke ta e gastonan medico anual, cu ta 1 biyon di e total di cien biyon euro cu e pais ta gasta na cuido medico.

Laga nos djis haci un comparacion cu loke nos ta gasta na Aruba pa cuido medico. Aña 2020 AZV a gasta casi 450 miyon florin en total. Si dedica un porciento di presupuesto di esey na informacion y educacion, nos ta papiando di mas di cuatro miyon florin, algo cu ni remotamente ta dedicando na e tarea aki actualmente. Pa bon comprension, no necesariamente esaki mester ta riba presupuesto di AZV, e ta pertenece mas riba presupuesto di e ministerio mes.

Algun atencion pa e otro elementonan di e recomendacionnan di e comision. Aki por nota cu e enfasis ta mayoritariamente riba con pa haya mas entrada pa gobierno y AZV y no tanto riba cortamento di gasto. Un contribucion personal (eigen bijdrage), aumento di BAZV, sugar tax. Dificil pa ta di acuerdo cu esaki, pasobra no ta nada mas cu aumento di entrada mientras cu diferente instancia ya a pronuncia cu no por sigui pone mas peso riba e poblacion. Pero esey ta e conclusion; cu no por corta gasto y mantene nivel di cuido. E medida menos recomendable ta un eventual aumento di BAZV, loke lo pone presion extra riba economia cu ta recuperando ainda. Ademas ta surgi e pregunta con ta para cu e reforma fiscal, unda tur e variantenan di BBO lo mester traha lugar pa un BTW. Sigur un bon topico pa e negociacionnan pa forma gobierno, si no a trat’e caba.