Den un solo anochi, di dialuna pa diamars e siman aki, 5 tienda a haya nan mes confronta cu kiebro y ladronicia den nan negoshi. Esaki no a sosode solamente den centronan di ciudad, pero tambe den barionan, manera na Salina Department Store cu den casi 20 aña na Paradera esaki tabata e prome biaha.
E manager di e negoshi ta bisa Bon Dia Aruba nunca a wak un motibo pa por ehempel pone heki di metal of otro forma di proteha nan negoshi pa motibo cu semper tabata keto. Esaki ta e prome biaha cu Automaxx a experiencia un kiebro den nan tienda y mirando con cos ta bayendo cu varios atraco y kiebro riba e isla, nan ta bay inverti mas den siguridad awor. Aunke nan tin alarma y camara caba. Sinembargo e ladronnan a tira un bloki y kibra e porta di glas.
Otro victimanan den e ‘ola di kiebro aki’ tabata Automaxx, cu ta casi bisiña di Salina na Paradera. E propietario tambe tin alarma. A constata cu via dak antisocial a kibra pa yega na e safe pero no a logra bay cu esaki ya cu no tin nada aden. Sinembargo e doño si ta keda cu e daño.
No mucho leu na San Barbola riba mesun anochi Boeny restaurant a experiencia un kiebro. Nan a uza un baranca pa destrui esaki y a drenta paden pa horta e caha di placa. Pero ora nan a bay habri esaki nan lo a haya cu mas of menos cu 10 florin, asina e propietario di e luga ta informa. Pero e ta keda atrobe cu e daño
Na Schotlandstraat ladronnan tambe a drenta Dijtham, despues di destrui un bentana di e negoshi. Y finalmente na Buccaneer Restaurant na Gasparito (Noord) riba mesun anochi un ladron a drenta via un buraco den e unidad di airco y asina por a logra bay cu e caha.
Atraco
Banda di esaki nos por mira ultimo tempo cu tur siman tin atraco of intento di atraco. Nos a papia cu e gerencia di Hard Rock Café cu a despues di varios intento di atraco a indica cu nan empleadonan tin miedo. Y cu nan ta falta control di polis, siguramente den oranan laat di anochi ora cu e negoshinan cuminsa cera.
“Specialmente den fin di siman, control di polis ta laga hopi di desea. Mi ta wak nan core rond den e oranan ”peak” manera 7or of 11or. Pero den fin di siman, riba diadomingo ora cu actividadnan ta caba mas trempan, nos a cuminsa sinti falta di siguridad”, asina gerencia ta splica Bon Dia (nan kier keda anonimo).
Nan ta conta di siman pasa di un incidente alrededor di 1:30 di marduga, unda tres persona cara tapa cu cuchiu grandi den man a sali for di un pida mondi anto purba atraca un trahado saliendo for di e porta patras di e edificio. ”Nos ta keda te laat haci inventario. E empleado ta conta nos cu despues el a sali pafo pa drenta su auto, tres persona a sorprende y bis’e para anto el a sali na careda subi e trapi parti patras di e edificio, core bin te dilanti pa e drenta bek den Hard Rock via entrada dilanti full spanta. Y esaki no ta prome biaha cu e tipo di incidentenan aki ta sosode.”
Nos a papia tambe cu otro restaurant den cercania manera Hooters Restaurant. Pero nan ta bisa cu den e 2 aña nunca a haya ningun tipo di problema asina y cu nan ta cera 1or di marduga unda cual ta basicamente ”net prome cosnan cuminsa pasa.”
“Riba un dia regular nos como manager por sali te 2or di marduga. Nos ta warda e persona cu ta haci limpi drenta pues semper tin hende ki den. Manera cos ta bayendo mi ta kere mester mas personal di siguridad den e area aki. Nos no ta haya esaki for di e Mall kende mester percura pa tin personal di siguridad pa e edificio, gerencia di Hard Rock ta bisa Bon Dia.
Cifranan di polis
E problema cu tin pa casi 8 aña ta cu polis continuamente ta bisa cu nan no tin e cifranan pa asina realmente por conclui cu tin mas criminalidad, y specificamente kiebro/ladronicia den negoshi (tampoco den cas) a of ta aumentando.
Polis ta manda prensa diariamente relatonan di incidentenan pero esaki ta solamente un seleccion di tur locual a pasa den un dia y anochi. Antes polis tabata invita prensa pa un presentacion unda por haya e cifranan y prensa mes por verifica e informacion. Pero pa haya cifranan awor a bira hopi dificil. Bon Dia Aruba a puntra polis awor con e situacion ta y realmente por papia di un ola of no na comienso di e siman aki.
Vocero di Cuerpo Policial Sr. Lito Laclé ta splica cu ta hopi dificil pa e bisa si e cantidad di kiebro a subi pasobra e no tin e cifranan su dilanti den general pa compara por ehempel kico a pasa September di aña pasa cu luna di September di e aña aki. ”Normalmente esaki ta wordo duna na fin di cada luna, mi lo mester wak e pa mi duna bo un contesta veridicio.”
Bon Dia Aruba a puntra Sr. Laclé si por a ripara cu ta ricibiendo mas yamada cu ta drenta cual ta relaciona cu kiebro y ladronicia pa locual. ”Tempo mi tabata traha como recherche mas o menos den aña 1997, mi so tabata sali pa 10 te cu 20 kiebro pa dia locual toch mi no ta sinti aworaki. Compara cu locual mi a experiencia temponan atras pero atrobe, mi mester di cifra ainda pa por verifica esaki”, Sr. Laclé ta bisa.
Sr. Laclé ta insisti cu e no ta facil, ni pa Cuerpo Policial ni tampoco e victimanan seguramente anto cu pueblo mester bira mas consciente cu temponan ta otro y haci nan negoshi menos atractivo pa ladronnan. ”Nos ta purba di conscientisa mas hopi cu ta posibel kico bo tin cu haci pa preveni esaki. Tin modus operandi cu tin cierto hendenan so ta uzando manera por ehempel subi riba dak y pa preveni esaki mester check solucionnan den direccion di ey.”
