Ayera tardi, Kids & Youth in Action e tene un charla educativo pa tur su miembronan hunto cu nan mayornan. E charla tabata den man di IBISA, cu a siña e muchanan e importancia di haci movecion y dietista Angelique Salsbach, cu a siña nan e importancia di come saludabel.
Sra. Mildred Wever, hunto cu Kamilah Dammers di IBISA tabata encarga cu e charla di actividad fisico. E charla a enfoca ariba con actividad fisico ta importante pa e desaroyo di e muchanan den nan crecemento.
Durante e charla, e muchanan presente a hunga algun wega y a haci un tiki ehercicio. E mayornan cu a compaña nan yiunan tambe a haya e oportunidad di participa den algun di e weganan. Sra. Angelique Salsbach, a duna un splicacion amplio y hopi educativo ariba e importancia di come cumindanan saludabel.
Durante su charla, el a demostra e cantidad di sucu cu cierto bebida y cuminda cu ta hopi popular entre mucha y hoben tin y con e cantidad di sucu por tin efectonan hopi dañino pa e salud. Kids & Youth in Action Foundation ta un fundacion cu ta enfoca pa mantene mucha- y hobennan activo den actividadnan sano y ta consisti di un grupo di baile cuminsando cu muchanan di cuater aña bay ariba. E fundacion a organisa e charla aki cu e meta pa sigui motiva tanto e mucha- y hobennan como nan mayornan tambe pa mantene un estilo di bida saludabel.
