Den fin di siman e grupo di baile y fundacion Kids & Youth in Action a tene un actividad cu e fundacion Buki di Pret pa muchanan di scol. Dos dia di actividad yena cu un variedad di actividad. Juf. Debra Boekhoudt, directora di e fundacion y grupo di baile, a conta tocante tur loke e muchanan a haci y siña durante e dos dianan di actividad.

Boekhoudt a splica cu esaki ta prome biaha cu Kids & Youth in Action ta participa y contribui cu un actividad pa muchanan di scol den temporada di vakantie cu e fundacion Buki di Pret.

“E tabata un experiencia hopi diferente compara cu tur actividad cu nos ta haci pasobra ki nan nos a haya oportunidad di conoce diferente mucha di diferente scol. Hopi di e muchanan ta muchanan cu nunca no a bay participa den un evento di baile. Nos a kere cu e lo tabata dificil, pero na final toch el a bira hopi goso y facil,” el a remarca.

El a conta cu tabata dos dia di actividad cu a consisti di un programa varia. Tabatin apertura na unda e muchanan a ser conoci cu otro, despues nan a haya un baile di body percusion, nan a haya un presentacion di PowerPoint di Sr. Ferdinand Franca tocante kico ta cultura di Aruba, nan a siña baila wals y tumba y tambe tabatin un les Freddy Montoya cu bin cu e perti di arte y musica.

E siguiente dia e muchanan a haci un ripiticion di baile di folklore, pero tambe a integra bailenan moderno, locual e muchanan a gusta hopi pasobra tabata canticanan cu nan conoce.

Boekhoudt a indica cu na mesun momento tabatin hopi wega tambe pa e muchanan, algo cu e muchanan a gusta masha hopi tambe. “Nan a pasa dushi, nan a haci actuacion, nan a hari, nan a pasa pret. Nan a haci competencia contra di otro, pero un competencia cu niun hende ta perde, e tabata un competencia di diversion y esey tambe a bay hopi bunita,” el a resalta.

Pa Boekhoudt un di e partinan mas bunita ta cu na final tur mucha a gosa y e por a wak esey riba nan expresion di cara. “Esey ta un satisfaccion pa mi, caminda tin goso y caminda nan a siña algo. Esey tabata e meta tambe di e programa. Muchanan nan a gosa y na final tambe nos a wak tambe con mayornan tabata duna bon feedback. Pasobra despues di e prome dia cu e muchanan a bay cas, mi a tende di e mayornan cu e muchanan a yega cas hopi contento y nan por a papia hopi di e dia. Esey tambe ta algo hopi bunita,” el a enfatisa.

Por ultimo el a indica cu e ta spera cu otro aña Kids & Youth in Action por participa un biaha mas den Buki di Pret. “E ta algo hopi dibertido pa nos y pa e muchanan.”

Sr. Ferdinand Franca, ken a duna e muchanan presentacion di folklore a splica cu e prome dia di presentacion el a presenta tur loke ta folklore. El a enfatisa cu ta importante pa e muchanan sa na prome luga kico e ta y dicon e ta importante tambe pa nan por sigui cune.

“Mi a splica nan cu folklore ta eigenlijk un tradicion, e ta pasa di generacion pa generacion y e ta importante tambe pa nan sa e importancia pa nan sigui cune, pa no lag’e muri,” el a subraya.

Franca a sigui splica cu el a papia tambe tocante e musica tipico, e musica tradicional di Aruba, di unda e ta bin y ki raiznan e tin. Ademas el a papia tambe kico ta e bailenan tradicional, con ta baila e bailenan aki, por ehemplo Dera Gai cu tin cierto patronchi pa baila, e baile di cinta etc.

E di dos dia, el a indica, el a papia ariba e vestuario, con ta usa e pañanan pa e bailenan di salon y con ta baila un tumba cu ta un tiki mas los y no mucho elegante y tur loke ta cierto pañanan, cu ainda ta wordo usa y spargatinan cu no ta haya mucho mas, pero cu tin gruponan cu ta us’e ainda.

Franca a caba e presentacion y laga e muchanan pensa ariba si mester mantene e bailenan tradicional manera nan ta. “Mi ta kere esey ta e pregunta, no solamente pa e muchanan , pero pa nos tur, pa nos pensa. Por ehemplo awendia e shimisnan ta manga cortico of e lomba ta un tiki mas habri, dus te na unda nos por permiti pa keda original, nos por tin tokenan moderno, pero mester purba mantene toch decente. Y tambe bailando mes, ki tanto bo por varia y hinca variacion den e pasonan pa asina e ta mustra moderno pero keda cu e parti original. Dus con moderno nos por bay cu e bailenan tradicional?,” el a remarca.